काठमाडौं (हाम्रो खेलकुद)– कतारको दोहामा नेपाल र म्यानमारको उमेर समूहको फुटबल टोलीबीचको मैत्रीपूर्ण खेल २–२ को बराबरीमा टुंगिएको छ । नेपाली यू २३ टोलीले दुई पटक सम्मको अग्रतालाई जोगाउन नसक्दा शुक्रबारको मैत्रीपूर्ण खेलमा बराबरीमा चित्त बुझाउनु परेको थियो ।

नेपालका लागि अनन्त तामाङ र रेजिन सुब्बाले गोल गरेका थिए । म्यानमारका लागि दुवै गोल ल्विन मोइ औङले गोल गरे । अन्ततले दोस्रो मिनेटमै गोल गर्दै टोलीलाई अग्रता दिलाएका थिए । कप्तान सुजल श्रेष्ठको कर्नरमा अनन्तले हेड गोल गरेका थिए । तर, ४० औं मिनेटमा ल्विनले गोल फर्काएपछि पहिलो हाफमा १–१ को बराबरी भएको थियो ।

दोस्रो हाफमा नेपालले पुनः अग्रता लियो । तर, त्यो लामो समय टिक्न सकेन । परिवर्तित खेलाडी रेजिनले ६० औं मिनेटमा गोल गर्दै नेपाललाई दोस्रो पटक अग्रता दिलाएका थिए । नवयुग श्रेष्ठको सट्टा रेजिन दोस्रो हाफमा मैदान प्रवेश गरेका थिए । ६४ औं मिनेटमा ल्विनले फ्रिकिकमार्फत गोल गर्दै खेललाई पुनः बराबरीमा पुर्याएका थिए ।

अर्को महिना स्वदेशमा आयोजना हुने १३ औं दक्षिण एसियाली खेलकुद (साग) को तयारीका सिलसिलामा नेपाली यू २३ टोली कतार भ्रमणमा गएको हो । त्यस्तै म्यानमार पनि साउथ इस्ट एसियन गेम्स (एसइए) को तयारीमा रहेको बताइएको छ । नेपाल सागअन्तर्गत फुटबलको साविक विजेता हो । सन् २०१६ मा भारतमा भएको सागको १२ औं संस्करणको फाइनलमा आयोजक टोलीलाई हराउँदै नेपालले स्वर्ण पदक जितेको थियो ।

टोलीका मुख्य प्रशिक्षक बालगोपाल महर्जनले सागमा ३ सिनियर खेलाडी राख्न पाउने प्रावधान अनुसार विक्रम लामा, सुजल श्रेष्ठ र नवयुगलाई टोलीमा समेटेका थिए । विदेशी लिग खेल्ने राष्ट्रिय टोलीका स्टारत्रय गोलकिपर किरण चेम्जोङ, रोहित चन्द र विमल घर्तीमगरलाई भने यसपटक भ्रमणमा राखिएको थिएन ।

किरण भारत, रोहित इन्डोनेसिया र विमल माल्दिभ्स क्लबमा आबद्ध छन् । सिनियर ५ खेलाडीमध्येबाट ३ खेलाडी सागका लागि पर्ने सम्भावना छ । सिनियरतर्फ किरण र रोहित पनि सागको टोलीमा छन् । साग मंसिर १५ देखि २४ गते सम्म काठमाडौं र पोखरामा आयोजना हुँदैछ ।

नेपाली यु–२३ टोली: अनन्त तामाङ, अन्जन विष्ट, बिक्रम लामा, सुजल श्रेष्ठ, दिनेश राजवंशी, तेज तामाङ, अभिषेक रिजाल, सुनिल बल, हेमन्त थापामगर, छिरिङ गुरुङ, अर्पन कार्की, दीप कार्की, देव लिम्बु, बिकास खवास, रोमन लिम्बु, नितिन थापा, सेसेहाङ आङदेम्वे, मिक्चेन तामाङ, रामचन्द्र वाजी, प्रिजेन तामाङ, रेजिन सुब्बा, राजीव लोप्चन, नवयुग श्रेष्ठ र सुमन अर्याल ।