हिमाल खरेल, झापा

ए डिभिजन टोली त्रिभुवन आर्मी अन्नपूर्ण हाम्रो पूर्वाञ्चल आमन्त्रण गोल्डकपको फाइनलमा पुगेको छ । भारतको सिक्किम आक्रमण एफसीलाई शुक्रबार टाइब्रेकरमा हराउँदै आर्मी उपाधि नजिक पुगेको हो ।

८० मिनेटको खेल गोलरहित बराबरीमा टुंगिएपछि टाइब्रेकरमा आर्मीले ४–३ ले बाजी मारेको हो । विर्तामोडको डोमालाल राजवंशी रंगशाला भएको खेलको टाइब्रेकरमा सिक्किमका विरेन प्रधान, मनोज काच्वा र करण राईले मात्र गोल गरेका थिए । एन्थोनी क्षेत्रीको प्रहार आर्मीका गोलरक्षक विवश चौधरीले रोके । त्यस्तै विकास क्षेत्रीको प्रहार भने बारमा लागेर फर्केको थियो ।

आर्मीका लागि दीपक गुरुङ, विकास तामाङ, राजीव गुरुङ र विवेक बस्नेतले गोल गरे । कप्तान टेकबहादुर बुढाथोकीको प्रहार सिक्किमका गोलरक्षक मनोज प्रधानले रोके । झापाली दर्शकको समर्थन पाएको सिक्किमका खेलाडीले थुप्रै अवसर खेर फाले । आर्मीको पटक पटको प्रयासलाई पनि सिक्किमका गोलकिपर मनोजले सफल हुन दिएनन् ।

आर्मी भरत खवास, नवयुग श्रेष्ठ, सुमन अर्याल, जज प्रिन्स कार्की विना मैदानमा उत्रेको थियो । भरत, नवयुग, सुमन मैत्रीपूर्ण खेलका लागि राष्ट्रिय टोलीसँग म्यानमारमा थिए । त्यस्तै जर्ज भने सेनाको प्रशिक्षणका लागि बंगलादेशमा छन् ।

खेलको म्यान अफ दी म्याच चुनिएका आर्मीका गोलकिपर विवशले १० हजार रुपैयाँ पाए । दोस्रो सेमिफाइनल शनिबार अर्को ए डिभिजन विभागिय टोली नेपाल पुलिस क्ल्ब र चर्च ब्वाइज युनाइटेडबीच हुनेछ । प्रतियोगिताको विजेताले १२ लाख ५० हजार दोस्रो हुने टोलीले ६ लाख २५ हजार रुपैयाँ प्राप्त गर्नेछ ।