काठमाडौं (हाम्रो खेलकुद) – तेस्रो संस्करणको चन्द्रागिरी मेयर गोल्डकप ‘ए’ डिभिजन स्तरीय फुटबल प्रतियोगितामा रुस्लान थ्री स्टारसँगै १२ टोलीको सहभागिता रहने भएको छ ।

आयोजक दीपशिखा युवा समूहले शुक्रबार कात्र्तिक ३० देखि हुने तेस्रो संस्करणको प्रतियोगितामा ‘ए’ डिभिजनका १० टोली र आयोजकको दुई गरी १२ टोलीको सहभागिता रहने जानकारी गराएको छ ।

१२ टोलीको सहभागितासँगै प्रतियोगिताको अवधि पनि लम्बिने भएको आयोजकले जनाएको छ । यसअघि आयोजकले मंसिर ७ मा फाइनल गराउने निर्णय गरेको थियो । तर, अब फाइनल १४ गते हुने प्रतियोगिता संयोजक तथा पुर्व अन्तर्राष्ट्रिय खेलाडी रमेश बुढाथोकीले जानकारी गराए ।

प्रतियोगितामा रुस्लान थ्री स्टार, त्रिभुवन आर्मी क्लब, नेपाल पुलिस क्लब, नेपाल एपीएफ क्लब, सिएमजी क्लब संकटा, भ्याली च्यासल युथ क्लब, सरस्वती युवा क्लब, ब्रिगेड ब्वाइज क्लब, जावलाखेल युवा क्लब र एनआइबिएल फ्रेन्डस् क्लबको सहभागिता रहेको छ । यस्तै आयोजकबाट दिपशिखा युवा समूह र चन्द्रागिरी नगरपालिका रहेको छ । आयोजकबाट दीपशिखा युवा समूह र चन्द्रागिरी नगरपालिकाका १५ वडाबाट खेलाडी छनोट गरेरअर्काे टोली तयार पारेको हो ।

यस्तै आयोजकले  प्रतियोगितामा सहभागी १२ टोलीलाई दुई समूहमा विभाजन गर्दै खेल तालिका समेत सार्वजनिक गरेको छ । समूह ‘ए’ मा आयोजक दिपशिखा युवा समूह, ब्रिगेड ब्वाइज क्लब, त्रिभुवन आर्मी क्लब, नेपाल पुलिस क्लब, जावलाखेल युथ क्लब र च्यासल युथ क्लब रहेका छन् । समूह ‘बी’ मा चन्द्रागिरी नगरपालिका, फ्रेन्डस क्लब, रुस्लान थ्री स्टार क्लब, संकटा क्लब, नेपाल एपिएफ क्लब र सरस्वती युथ क्लब रहेका छन् ।

सार्वजनिक तालिका अनुसार उद्घाटन खेलमा कात्तिक ३० गते आयोजक दिपशिखा युवा समूह र ब्रिगेड ब्वाइज क्लबबीच प्रतिस्पर्धा हुनेछ । प्रतियोगिताको दोस्रो दिन मंसिर १ गते चन्द्रागिरी नगरपालिका र फ्रेन्डस क्लबबीच खेल हुनेछ ।

२ मंसिरमा पुलिस र जावलाखेल, ३ मंसिरमा संकटा र एपीएफ, ४ मंसिरमा आर्मी र च्यासल तथा ५ मंसिरमा सरस्वती युवा क्लब र रुस्लान थ्री स्टार क्लबबीच प्रतिस्पर्धा हुनेछ । ७ र ८ मंसिरमा क्वाटरफाइनल खेल हुनेछ । १० र ११ मंसिरमा सेमिफायनल तथा १४ मंसिरमा फाइनल खेल हुनेछ ।

यसवर्षको विजेताले ६ लाख ५० हजार रुपैयाँ पाउनेछ । दोस्रो हुनेले ३ लाख ५० हजार रुपैयाँ हात पार्नेछ । गतवर्ष ६ लाख र ३ लाख रुपैयाँ पुरस्कार राशि रहेको थियो । सर्वाेत्कृष्ट खेलाडी र सर्वाधिक गोलकर्ताले समान ३० हजार रुपैयाँ प्रदान गरिनेछ । प्रतियोगिताको अनुमानित लागत झन्डै ५० लाख रुपैया रहेको छ ।

पहिलो संस्करणमा हिमालय शेर्पा क्लब तथा दोस्रो संस्करणमा भ्याली च्यासल युथ क्लब च्याम्पियन बनेको थियो । खेलहरु चन्द्रागिरी नगरपालिकास्थित नैकाप फुटबल मैदानमा हुनेछ ।