काठमाडौं (हाम्रो खेलकुद) – क्विक्स कप अन्तर विद्यालय छात्र-छात्रा राष्ट्रिय फुटबल प्रतियोगिताको फाइनल चरणका खेलहरु आइतबारदेखि शुरु हुने भएको छ ।

युवा तथा खेलकुद मन्त्रालयको कार्यक्रम अनुसार राष्ट्रिय खेलकुद परिषदको समन्वयमा चौधरी ग्रुपको मुख्य प्रायोजन तथा अखिल नेपाल फुटबल संघ (एन्फा) को आयोजनामा हुने अन्तिम चरणमा ५२ वटा जिल्लाबाट छनोट भएका १६ टोलीले छात्रतर्फ तथा १२ टोलीले छात्रातर्फ प्रतिस्पर्धा गर्नेछन् । ८ मंसिरदेखि १९ मंसिरसम्म हुने प्रतियोगितामा सहभागी १६ टोलीलाई ४ समूहमा विभाजन गरिएको छ ।

छात्रातर्फ पनि १२ टोलीलाई ४ समूहमा नै विभाजन गरिएको छ । छात्रातर्फको २० मंसिरदेखि २७ मंसिरसम्म सञ्चालन हुनेछ । हरेक समूहका शीर्ष दुई टोलीले क्वाटरफाइनलमा स्थान बनाउनेछन् । जेठ २५ गतेबाट ५२ जिल्लाका विद्यालयहरुले असार मसान्तसम्म जिल्लास्तरमा प्रतिस्पर्धा गरेका थिए । भाद्र र आश्विनमा सातै प्रदेशमा प्रदेशस्तरीय छनोट प्रतियोगिताबाट छात्रतर्फ १६ र छात्रा तर्फ १२ विद्यालय छनोट हुन सफल भएका थिए ।
प्रतियोगिताको छात्र÷छात्रा दुवैतर्फको विजेताले ३ लाख रुपैया हात पार्नेछन् । दोस्रो हुनेले १ लाख ५० हजार रुपैया हात पार्नेछन् । तेस्रो हुनेले ७५ हजार रुपैया तथा चौथो हुनेलाई ५० हजार प्रदान गरिनेछ ।

प्रतियोगितामा एन्फाका सह महासचिव अरुणमान जोशी, सिजीका सिनियर जनरल महाप्रवन्धक विश्वास राई र उप महाप्रवन्धक लालबाबु प्रसादको उपस्थिति रहेको थियो ।