काठमाठौं (हाम्रो खेलकुद)– जापानमा आयोजना हुने अन्तर्राष्ट्रिय यू–१२ टोरे कप फुटबलका लागि अखिल नेपाल फुटबल संघ (एन्फा) र पूर्व राष्ट्रिय खेलाडी बसन्त गौचनले नेतृत्व गरेको नेपाल युथ सकर प्रोजेक्ट (एनपिओ) बीच शनिबार सम्झौता भएको छ ।

टोरे कपका लागि नेपाली यू–१२ फुटबल टोलीको तयारी एन्फाले गर्ने र टोलीको सहभागिताको बाँकी जिम्मेवारी एनपिओले लिने गरि सम्झौता भएको हो । एन्फा अध्यक्ष कर्मा छिरिङ शेर्पा र प्रोजेक्टका अध्यक्ष गौचनले सम्झौता पत्रमा हस्ताक्षर गरे ।

नेपालले एनपिओसँग सहकार्य गरेर प्रतियोगिता खेल्नेछ । प्रतियोगिताको लागि नेपालमा खेलाडी छनोट एन्फाले गर्नेछ । प्रतियोगिताका लागि जापानमा रहदाको सम्पूर्ण खर्च भने एनपिओले गर्नेछ । यस्तै जापानको फन रुट्स एकेडेमीले सहयोग गर्नेछ । फन रुट्समा गौचन प्रशिक्षकका रुपमा कार्यरत छन् ।

यसअघि एनपिओले कास्की फुटबल संघसँग सहकार्य गरेर टोलीको छनोट गर्दै प्रतियोगिता खेल्दै आएको थियो । एनपिओले यसपटकबाट भने एन्फासँग सहकार्य गरेको हो ।गौचनले नेपाली फुटबललाई दीर्घकालीन सहयोग पु¥याउन यस्ता प्रतियोगिता फलदायी हुने भएकाले एन्फासँग सम्झौता गरिएको बताए ।

एन्फा अध्यक्ष शेर्पाले युवा फुटबल विकासका लागि एन्फा लागि परेको जनाउदै प्रतियोगितामा प्रदेशबाट छानिएका १२ खेलाडीलाई जापान पठाउने बताए । उनले खेल जीवन पछि विदेशी भूमि बसेर पनि फुटबल प्रशिक्षकको भूमिका निर्वाह गरेको भन्दै गौचनको तारिफ गरेका थिए ।

टोकियोमा हुने अन्तर्राष्ट्रिय यू–१२ टोरे कप फुटबल मार्च अन्तिम साता हुनेछ । प्रतियोगितामा स्पेन, फ्रान्स, अष्ट्रेलिया, जर्मनी, मलेसिया लगायतका टिम र जापानको जे लिग क्लबका युथ टिमको सहभागिता रहने गौचनले जानकारी दिए ।