काठमाडौं (हाम्रो खेलकुद) – ए डिभिजन क्लब जावलाखेल युवा क्लबलाई प्रभु बैंकले मुख्य प्रायोजन गरेको छ ।

ललितपुरको जावलाखेलस्थित मुख्य बजारमा आफ्नै मैदान भएको क्लबले बैंकसँग १ वर्ष सम्झौता गरेको छ । प्रभु बैंकले प्रमुख प्रायोजक भए वापत २५ लाख यस क्लबलाई प्रदान गर्नेछ । यस अवधिमा क्लबको फुटबल जर्सीको अगाडिको भागमा प्रभु बैंकको नाम रहनेछ ।

टोलीलाई स्पोर्ट्स वेयर ब्रान्ड लीनिङको पनि साथ रहेको छ । लिनिङले वर्षभर झन्डै १२ लाख बराबरको सामाग्री उपलब्ध गराउने छ । अफिसियल अस्पतालका रुपमा स्टार हस्पिटल रहने छ । लिनिङले क्लबलाई सबै खेलाडी र अफिसियललाई खेल सामग्री प्रदान गर्ने । त्यस्तै स्टार हस्पिटल मेडिकल, डाक्टर, प्राथमिक उपचार र फिजियो उपलब्ध गराउने छ ।

क्लबमा यसपटक तीन जना विदेशी खेलाडी रहेका छन् र चौथा खेलाडीका रुपमा सिक्किमका एक भारतीय खेलाडी ल्याउने प्रयास अन्तिम चरणमा पुगेको छ । गत वर्षको लिगमा यस क्लबबाट खेलेको खेलाडीलाई नै निरन्तरता दिइएको छ । विदेशी खेलाडी फोडे फोफाना र एडामा डुम्बिया निरन्तर रहेका छन् ।

क्लबले गत वर्षको लिगको प्रदर्शनलाई विश्लेषण गरी रुपबहादुर लामालाई नेपाल एपीएफ क्लब, दिलन लोक्तामलाई ब्रिगेड ब्वाइज क्लब तथा नेपाल पुलिस क्लबवाट सुरज घिमिरे र हरि कठायत लाई अनुबन्धन गरेको छ ।

क्लबले विसं २०३९ सालको लिगमा दोस्रो र २०६७ मा तेस्रो स्थान हासिल गरेको थियो । यसपटक लिगमा क्लबले यसै नतिजा दोहोर्याउने अपेक्षा राखेको छ।

प्रभु बैंकका प्रमुख कार्यकारी अधिकृत अशोक शेरचनले बैंकले क्लबलाई प्रायोजन मात्र नभएर फुटबल विकासमा साथ दिन चाहेको बताए । उनले क्लबका खेलाडीको विमा, एकेडेमी स्थापना, मोफसलमा ट्यालेन्ट हन्ट लगायत विषयमा ध्यान दिने जानकारी गराए ।

क्लबका अध्यक्ष महेन्द्र क्षेत्रीेेले प्रायोजन सम्झौताले क्लबको फुटबल विकासमा अगाडि बढ्ने लक्ष्यमा ठूलो साथ पुगेको बताए । उनले सम्पूर्ण सहयोगी हातलाई धन्यवाद दिँदै राम्रो नतिजा ल्याउनेमा विश्वस्त रहेको बताए ।

जावलाखेल युथ क्लबको टोली :

कुलदिप कार्की (कप्तान), टिकेन्द्र थापा, अरुण ब्लोन,सुशील कुमार यादव, मनिष पौडेल, सिमान्त थापा, निरबहादुर आले, विमल घिसिङ, सुजित बुढाथोकी, गौतम श्रेष्ठ, सुरज ठकुरी, विशाल तामाङ, अरुज सिं, समिर कार्की, रुप बहादुर लामा, बिजय घलान, ड्याडी जुनियर वाम्बा (क्यामरुन), फोडे फोफाना (गिनी), एडामा डुम्बिया (माली), यज्ञ प्रधान, दिलेन लोक्ताम, हरि कठायत, सुरज घिमिरे, अभिषेक वाइबा, गौरव श्रेष्ठ

प्रशिक्षक : नरेश थापा

सहायक प्रशिक्षक : जग्गुनाथ खड्का

व्यवस्थापक : प्रदीप तण्डुकार

सहायक व्यवस्थापक : विकास काकी

फिजियो : रन्जन राज शाह