काठमाडौं (हाम्रो खेलकुद)– कतार एयरवेज सहिद स्मारक ए डिभिजन लिगको छैटौं चरणमा अब ३ खेल मात्र बाँकी छन् । त्यसमध्ये दशरथ रंगशालामा आज हुँदैछन् । पहिलो खेल नेपाल पुलिस क्लबल र न्यूरोड टिम (एनआरटी) बीच दिउँसो १२ बजे सुरु हुनेछ ।

पुलिस ८ अंकसहित छैटौं स्थानमा छ भने नवौ स्थानको एनआरटीको ५ अंक छ । एनआरटीले ५ खेलमा २ जित र १ बराबरका साथ ७ अंक जोडेपछि गत वर्ष लिगको पुछारमा रहेका कारण यस वर्ष टोलीको खाताबाट २ खेल घटाइएको छ । २ खेलमा भने टोलीले हार बेहोरेको छ ।

अर्को तिर पुलिसले ५ मध्ये २ खेलमा जित २ बराबरी खेलेको छ भने १ खेलमा हार बेहोरेको थियो । एनआरटीलाई हराउन सके पुलिस रुस्लान थ्री स्टार क्लबलाई पछि पार्दै चौथो स्थानमा उक्लनेछ । थ्री स्टारको खातामा अहिले १० अंक छ । थ्री स्टार आइतबार एनआइबिएल फ्रेन्ड्स क्लबसँग १–० ले पराजित भएको थियो ।

एनआरटीको दाउ पनि पुलिसलाई हराउँदै छैटौं स्थानमा पुग्ने हुनेछ । पुलिसले एकपछि अर्को खेलमा क्रमश प्रदर्शनमा सुधार ल्याइरहेको छ । पछिल्लो खेलमा च्यासल क्लबसँग २–२ को बराबरी खेलेपछि पुलिसका प्रशिक्षक अनन्तराज थापाले टोलीको प्रदर्शनमा सुधार आइरहेको र अझै सुधार गर्नुपर्ने ठाँउ रहेको बताएका थिए ।

जारी लिगमा पुलिस थ्री स्टारसँग पराजित भएको थियो । सरस्वती युथ क्लब र संकटालाई हराएको पुलिसले च्यासल र यति हिमालयन शेर्पासँग बराबरी खेलेको थियो ।

सरस्वतीलाई ४–० ले हराउँदै लिगमा सुखद सुरुवात गरेको एनआरटीले च्यासललाई हराउँदै दोस्रो जित गर्दा गराएको थियो । जावलाखेल युथ क्लबलसँग गोलरहित बराबरी खेलेको टोलीले संकटा र मछिन्द्रसँगको खेल समान १–० ले गुमाएको थियो ।