अर्जुन कार्की, बागलुङ

बागलुङमा अर्को महिना खुल्ला नगरपालिका स्तरिय दोस्रो राष्ट्रिय मेयरकप फुटबल प्रतियोगिता आयोजना हुने भएको छ । बागलुङ नगरपालिकाको आयोजना र जिल्ला फुटबल संघको संयोजनमा माघ १६ गतेदेखि २२ गतेसम्म मेयर कप फुटबल हुने सोमबार पत्रकारमार्फत जानकारी गराइयो ।

स्थानिय तहको निर्वाचनपछि पहिलो वर्षबाट सुरु गरिएको प्रतियोगिता गतवर्ष नभएपनि यस वर्ष पुनः आयोजना आयोजना गर्न लागिएको बागलुङ नगरपालिकाका मेयर जनकराज पौडेलले जानकारी दिए ।

मेयर पौडेलले प्रतियोगितामा देशभरका नगरपालिकाहरु र उपमहानगरपालिकाहरुले भाग लिन सक्ने उल्लेख गर्दै स्थानिय तहको सिफारिसमा राष्ट्रिय खेलाडीलाई पनि टोलीमा समावेश गर्न पाउने बताए । पौडेलले बागलुङ जिल्लालाई खेलकुद तथा पर्यटकीय गन्तव्यको रुपमा विश्वसामु परिचित गराउने उद्देश्यले प्रतियोगिताको आयोजना गरिएको बताए ।

शहिद दिवसको दिनमा मेयरकपको सुरुवात गर्न लागिएको र भविष्यमा पनि यसलाई निरन्तरता दिने लक्ष्य रहेको मेयर पौडेलले बताए । प्रतियोगितामा झन्डै २२ लाख रुपैयाँ खर्च हुने अनुमान गरिएको छ । प्रतियोगिता बागलुङ नगरपालिका–१ को बाङ्गेचौर खेलमैदानमा हुनेछ ।

प्रतियोगितामा १२ देखि २० टोलीको सहभागिता रहने अपैषा गरिएको जिल्ला फुटबल संघ बागलुङका अध्यक्ष रामराज गुरुङले बताए ।पुरस्कार राशीमा पनि विगतमा भन्दा बृद्धि गरिएको छ । यसपटक विजेताले उपाधिसहित ३ लाख, दोस्रोले २ लाख तथा सेमिफाइनल पुग्ने टोलीले समान ६० हजार रुपैयाँ प्राप्त गर्नेछन् ।

प्रतियोगिता सर्वोत्कृष्ट खेलाडीले १० हजार तथा विधागत तर्फका उत्कृष्ट फरवार्ड, उत्कृष्ट मिडफिल्डर, उत्कृष्ट डिफेन्डर, उत्कृष्ट गोलकिपर र उच्च गोलकर्ताले समान ५ हजार रुपैयाँ पाउनेछन् । हरेक खेलका म्यान अफ दि म्याचले २ हजार रुपैयाँ पाउनेछन् ।

नगरपालिकाले २०७४ सालमा प्रदेश नम्बर ४ स्तरीय मेयरकप प्रतियोगिता आयोजना गरेको थियो । त्यति बेला पोखरा उप महानगरपालिकालाई हराउँदै स्याङ्जाको वालिङ नगरपालिकाले उपाधि जितेको थियो । प्रतियोगिता सञ्चालनका लागि विभिन्न समिति पनि गठन भएका छन् ।

मैदान व्यवस्थापन संयोजकमा राजकुमार शर्मा, प्रचारप्रसार संयोजकमा सुर्य लामिछाने, झाँकी तथा सांस्कृतिक कार्यक्रम संयोजकमा जय राजभण्डारी, प्राथमिक उपचार संयोजकमा लोक बहादुर खड्का, रेफ्रि र कमिशनरमा विकास थापा, खाजा व्यवस्थापनमा रुविना श्रेष्ठ थापा, खेलाडी व्यवस्थापनमा प्रकाश शर्मा छन् ।

त्यस्तै मञ्च र स्टल व्यवस्थापनमा राहुल बोहरा, टिकट र निमन्त्रणा संयोजकमा सुरज खड्का, पुरस्कार र मायाको चिनो संयोजकमा भानु आचार्य, उद्घाटन र समापन समारोह संयोजकमा रेशम गोतामे, सम्मान तथा सुरक्षा संयोजकमा राम शर्मा र स्वर्यसेवक स्रयोजकमा राजकुमार बोसेल छन् ।