काठमाडौं (हाम्रो खेलकुद) – सिएमजी क्लब भारतको गुहावाटीमा जारी छैटौं भेट्रान्स अन्तर्राष्ट्रिय फुटबल च्याम्पियनसिपको फाइनलमा प्रवेश गरेको छ । आइतबार भएको सेमिफाइनमा दिल्ली भेट्रान्स टिमलाई पेनाल्टी सुटआउटमा ४–३ ले पराजत गर्दै सिएमजीले फाइनलमा स्थान बनाएको हो ।  

पेनाल्टीमा सन्तोष बस्नेत, भुपेन्द्र लिम्बु, नरेश श्रेष्ठ र नगेन्द्र लिम्बुले गोल गरे । त्यसअघि सिएमजी समूह विजेता बन्दै सेमिफाइनलमा प्रवेश गरेको थियो । लिग चरणको पहिलो खेलमा सिएमजी भेट्रान्स टोली कोलकातासँग गोलरहित बराबरीमा रोकिएको थियो ।

दोस्रो खेलमा गुहावटीलाई ४–० ले पराजित गरेको थियो । गुहावटीविरुद्ध नगेन्द्र लिम्बुले दुई तथा जिवेश पाण्डे र नरेश श्रेष्ठले गोल गरेका थिए । लिगको तेस्रो खेलमा सिएमजीले भारतीय लेजेन्ड भाइचुङ भुटियासम्मिलित सिक्किम युनाइटेडलाई २–१ ले पराजित गरेको थियो । दुवै गोल नगेन्द्र लिम्बुले गरेका थिए ।

१८ खेलाडी र २ अफिसियलसहितको टोली बुधबार गुहावटी प्रस्थान गरेको थियो । नेपाली टोलीको कप्तानी नेपाली राष्ट्रिय फुटबल टोलीका पूर्व कप्तान बालगोपाल महर्जनले गरेका छन् । टोलीमा राष्ट्रिय टोलीका पूर्व कप्तान राकेश श्रेष्ठलगायतका खेलाडी रहेका छन् ।

१३ औं दक्षिण एसियाली खेलकुद (साग) को सहायक प्रशिक्षकका रुपमा रहेका पूर्व राष्ट्रिय खेलाडी राजेश मानन्धर प्रशिक्षक र फुटबल प्रशिक्षक जयकृष्ण श्रेष्ठ टोलीको व्यवस्थापक रहेका छन् । च्याम्पियनसिपमा १२ टोलीको सहभातिगा रहेको छ ।