काठमाडौं (हाम्रो खेलकुद)– मोफसलको पुरानो गोल्डकप मध्येको तिलोत्तमा गोल्डकप फुटबल प्रतियोगिता आयोजनाको मिति पछि सरेको छ । रुपन्देही फुटबल संघको आयोजनामा आज (बिहीबार) प्रतियोगिता सुरु हुने यसअघि बताइएको छ ।

प्रतियोगिताका प्रचार प्रसार समितिका संयोजक सुरज थापाले बुधबार प्रेस विज्ञप्ती जारी गर्दै चैत १ देखि १० गतेसम्म तिलोत्तमा हुने जानकारी गराएका छन् । विभिन्न जिल्लामा गोल्ड कप सञ्चालन भइरहेको र तोलोत्तमा प्रतियोगिताको प्राविधिक तयारी पुरा नहुँदा पूर्व निर्धारित मितिमा तिलोत्तमा गर्न असमर्थ भएको विज्ञप्तीमा उल्लेख गरिएको छ ।

बुटवल उपमहानगपालिकाको संरक्षकत्वमा हुने प्रतियोगितामा १० टोलीको सहभागिता रहने यसअघि नै जानकारी गराएसकिएको छ । एन्फा टेक्निकल सेन्टर देबिनगरमा हुने प्रतियोगिताको विजेताले १० लाख ५० हजार तथा दोस्रो हुने टोलीले ७ लाख ५० हजार रुपैयाँ प्राप्त गर्नेछन् । सघंले प्रत्येक बर्ष पुरस्कार राशीमा बृद्धि गर्दै आएको छ । गतबर्षको विजेताले ८ लाख ८८ हजा रुपैयाँ प्राप्त गरेको थियो ।

प्रतियोगिताको सर्वोत्कृष्ट खेलाडीले मोटर साइकल तथा विधागत उत्कृष्ट ४ खेलाडी र प्रशिक्षकले ३० हजार रुपैयाँ प्राप्त गर्नेछ । प्रतियोगितामा विदेशी क्लब, ए डिभिजन क्लब, आयोजक र अन्य जिल्लाका केहि क्लबको सहभागिता रहने बताइएको छ । २०३१ सालमा स्थापना भएर २०३३ सालबाट शुरु भएको तिलोत्तमा गोल्डकप नकआउट फुटबल प्रतियोगिता घरेलु फुटबलको पुरानो गोल्डकप मध्येको एक हो । तिलोत्तमा अखिल नेपाल फुटबल सघं (एन्फा) ले क श्रेणी प्राप्त प्रतियोगिता हो ।