काठमाडौं (हाम्रो खेलकुद) – नेपाली राष्ट्रिय फुटबल टोलीका मिडफिल्डर रोहित चन्द सम्मिलित पर्सिजा जकार्ता प्रि सिजनको प्रतियोगिता इस्ट गभर्नर्स गोल्डकपको फाइनलमा पर्सेबयासँग ४-१ ले पराजित भएको छ । खेलको ३० औं मिनेटमा नै १० खेलाडीमा समेटिएपछि पर्सिजाले फराकिलो हार बेहोरेको हो ।

खेलको तेस्रो मिनेटमा नै पर्सेबयाले ओक्टेभियन फर्नान्डोको गोलमा अग्रता लिएको थियो । पर्सिजाले त्यसपछि लगातार दवाव दिएपनि गोल फर्काउन सकेन । ३० औं मिनेटमा रयोजी उतोमोले डेबिड सिल्भालाई फल हानेपछि रेफ्रीले सिधै रातो कार्ड दिँदा पर्सिजा १० खेलाडीमा समेटियो । एक खेलाडी कम हुनुका बाबजुद ४२ औं मिनेटमा मारको सिमिचले गोल गर्दै खेल बराबरीमा ल्याए ।

पहिलो हाफमा १-१ को बराबरीमा रोकेपनि दोस्रो हाफमा भने पर्सेबयाले खेलमा पकड जमायो । ५२ औं मिनेटमा मकन कोनाटेले गोल गर्दै अग्रता पुन: स्थापना गरे । त्यसको ४ मिनेटमा नै रिकी काम्बुयाले पर्सेबयाको अग्रता दोब्बर पारे । महमुद इदले ८० औं मिनेटमा गोल गर्दै पर्सेबयाको उपाधि पक्का गरे ।

प्रतियोगिताको समूह चरणमा अपराजित रहेको पर्सिजाले सेमिफाइनलमा मदुरा युनाइटेडलाई २-१ ले पराजित गरेको थियो । रोहितले प्रतियोगिताका सबै खेलमा सुरुवाती रोजाईमा खेलेका थिए । उनले समूह चरणको दोस्रो खेलमा मलेसियाको सबाह एफसीविरुद्ध गोल पनि गरेका थिए । इन्डोनेसियाको शीर्ष डिभिजन लिग मार्च १ देखि सुरु हुँदा टोली हाल प्रि सिजन तयारीमा व्यस्त छ ।