बाँसबारी र ब्वाइज युनियनको जित

एजेन्सी – अराउन्ड द हिमालयज बाँसबारी क्लब र डिभाइन ब्वाइज युनियन क्लबले सहिद स्मारक बी डिभिजन लिगमा विजयी सुरुवात गरेका छन् ।

आइतबार सातदोबाटोस्थित एन्फा कम्प्लेक्सको मैदानमा भएको लिगको उद्घाटन खेलमा ब्वाइज युनियनले श्री कुमारी क्लबमाथि २-० को जित दर्ता गर्यो । ब्वाइज युनियनले पहिलो हाफको ४१ औं मिनेटमा वर्तमान राईको गोलमा अग्रता लिएको थियो । वर्तमानले क्रसबारमा लगेर फर्केको बललाई गोलमा परिणत गरेका थिए । दोस्रो हाफमा वैकल्पिक खेलाडी प्रदीप बोगटीले गोल गर्दै ब्वाइज युनियनको जित पक्का गरे ।

दिनको दोस्रो खेलमा बाँसबारीले श्री भगवती क्लबलाई १-० ले हरायो । निकै प्रतिस्पर्धात्मक खेलमा बाँसबारीका लागि वैकल्पिक खेलाडी सुलेमान थापामगरले निर्णायक गोल गरे । ६१ औं मिनेटमा मैदान प्रवेश गरेका उनले दुई मिनेटपछि नै वन भर्सेस वनको स्थितिमा विपक्षी गोलरक्षक अमानत शेखलाई बिट गरेका थिए ।