काठमाडौं (हाम्रो खेलकुद) – कप्तान जुमानु राईले दुई गोल गरेपछि नेपाल पुलिस क्लबले मेची नेत्रालय काक्करभित्ता फुटबल ट्रेनिङ सेन्टरलाई ३-१ ले पराजित गर्दै २२ औं बुढासुब्बा गोल्डकपको सेमिफाइनलमा स्थान पक्का गरेको छ ।

धरान रंगशालामा भएको खेलमा मेचीले सुरुवाती अग्रता लिएपनि पुलिसका लागि जुमानुले दोस्रो हाफमा दुई गोल गर्दै जित पक्का गरे । खेलको १० औं मिनेटमा संजय धिमालको गोलमा मेचीले खेलमा अगाडि बढेको थियो । तर पहिलो हाफको अन्त्यतिर दुई मिनेटको अन्तरमा दुई गोल गर्दै पुलिस अग्रता लिन सफल रहयो ।

खेलको ४३ औं मिनेटमा भोला सिलवालको पासमा सुमन सुवेदीले उत्कृष्ट हेडिङ गोल गर्दै खेल बराबरीमा ल्याए । लगत्तै दुई मिनेटपछि नै पुलिस खेलमा अगाडी बढ्यो । पुलिसका तिर्थ रानालाई लडाएपछि ३५ यार्डमा प्राप्त फ्रिकिकमा जुमानुको प्रहार सिधै गोलमा परिणत हुँदा पुलिसले पहिलो हाफमा २–१ को अग्रता लिन सफल भयो ।

दोस्रो हाफमा आक्रमक बनेको मेचीले काउन्टर अट्याकमा गोल खाँदा खेलमा फर्कने सम्भावना तुहिएको थियो । ७७औं मिनेटमा जुमानु राईले व्यक्तिगत दोस्रो तथा टोलीका लागि तेस्रो गोल गदै पुलिसको जित पक्का गरे । त्यसअघि कर्ण लिम्बुले वान भर्सेज वानमा गोल गर्न चुकेका थिए । ६९औं मिनेटमा कर्ण लिम्बुले सबै खेलाडी बिट भएको अवस्थामा गरेको फ्लिक प्रहार पोस्टबाट थोरै बाहिरियो ।

दुई गोल गरेका जुमानु राईले खेलको म्यान अफ दि म्याच घोष्ति भए । उनले १५ हजार रुपैयाँ प्राप्त पारे । प्रतियोगितामा सोमबार मुख्यमन्त्री लिग विजेता बेलबारी फुटबल क्लब झापा र मनाङ मर्स्याङ्दी क्लबबीच खेल हुनेछ ।