दिपक बोहोरा, इलाम

झापा ११ फुटबल छैटौं माइभ्याली गोल्डकपको पहिलो खेलबाटै बाहिरिएको छ । इलाममा जारी प्रतियोगितामा शनिबार भारतको मानेभञ्ज्याङ एफसी दार्जिलिङ संग २–१ ले पराजित हुँदै झापा बाहिरिएको हो ।

मानेभञ्ज्याङ सेमिफाइनल पुगेको छ । माने भञ्जाङले सेमिफाइनलमा रुपन्देही ११ र लिग च्याम्पियन सानमिगल मछिन्द्र क्लबबीचको विजेतासँग प्रतिस्पर्धा गर्नेछ । ठूलो टुडिखेलमा भएको खेलकोे २३ औ मिनेटमा मानेभञ्ज्याङ पिनसाई लाथोङले गोल गर्दै अग्रता लिएका थिए ।

रक्षापक्तिको कमजोरीको फाइदा उठाउँदै उनले गोल गरेका हुन् । लाथोङले ४८ औं मिनेटमा अर्को गोल गरे । खेलको ८४ औं मिनेटमा ११ सरोज कार्कीले गोल गरेपनि झापा खेलमा फर्कन सकेन ।

टोलीका सिनियर खेलाडी ए डिभिजनका विभिन्न क्लबहरुमा आबद्ध भएपछि झापा ११ ले पुरानो साख गुमाउँदै पहिलो खेलमा नै पराजित हुन पुगेको हो । झापा ११ माइभ्यालीमा यसअघि दुई पटक उपाधि जितेको थियो । म्यान अफ दि म्याच बनेका मानेभन्ज्याङका लाथोङले १० हजार रुपैयाँ प्राप्त गरे ।

लिग च्याम्पियन मछिन्द्रसहित ए डिभिजनका ३ क्लब त्रिभुवन आर्मी क्लब, संकटाको सहभागिता रहेको प्रतियोगितामा १० टोलीको सहभागिता रहेको छ । फागुन २४ गते सम्म चल्ने गोल्डकपको विजेताले ८ लाख र दोस्रो हुने टोलीले ५ लाख रुपैयाँ प्राप्त गर्नेछ ।

माइभ्याली गोल्डकपमा आइतबार हुने खेल

त्रिभुवन आर्मी क्लब विरुद्ध संकटा क्लब