एजेन्सी – युइएफए च्याम्पियन्स लिग फुटबलमा आज राति प्रि–क्वाटरफाइनलको दोस्रो लेगका दुई खेलहरु हुँदैछ । जर्मन क्लब आरबी लाइप्जिगले घरेलु मैदानमा साविकको उपविजेता इंग्लिस क्लब टोटेनहमको आतिथ्यता गर्दा स्पेनिस क्लब भ्यालेन्सियाले इटालियन क्लब एटलान्टासँग खेल्दैछ ।

दुवै खेल नेपाली समय अनुसार मंगलबार राथि १ः४५ बजे हुनेछ । घरेलु मैदानमा १–० को नतिजा सुम्पिएको टोटेनहम आरबी लाइप्जिगलाई पराजित गर्दै क्वाटरफाइनल पुग्ने दाउँमा हुनेछ । रेडबुल एरिनामा खेल्ने टोटेनहम पहिलो इंग्लिस क्लब बन्नेछ । जर्मनी प्रतिद्द्वन्द्वीविरुद्ध अवे खेलमा टोटेनहमले पछिल्लो पाँच खेलमा एक मात्रै हार बेहोरेको छ । यसै सिजन टोटेनहम बायर्नसँग अवे मैदानमा ३–१ ले पराजित भएको थियो ।

आरबीविरुद्ध जित निकाल्न नसके साविकको उपविजेता टोटेनहम प्रि–क्वाटरफाइनलबाटै बाहिरिने छ । यस्तो अवस्थामा टोटेनहमलाई अघि बढ्न कम्तीमा पनि २–० को जित आवश्यक छ । गोलरहित बराबरीमा खेल टुंगिए टोटेनहमलाई अवे गोल महँगो पर्न सक्नेछ । १–० को जितमा आशा जीवितै हुनेछ ।

फरवार्ड ह्यारी केन, सन ह्युङ मिन लगायत मुख्य खेलाडीहरु घाइते हुँदा टोटेनहमले पछिल्लो खेलमा राम्रो खेल्न सकेको छैन । त्यसैले टोटेनहमले सम्हालिएर खेल्दै आरबीविरुद्ध जित निकाल्ने दाउमा हुनेछ । यता, घरेलु टोली आरबी लाइप्जिग पाहुना टोलीलाई पराजित गर्दै क्वाटरफाइनल पुग्ने दाउँमा हुनेछ । लाइप्जिगलाई बराबरी नै अर्काे चरण पुग्न पर्याप्त हुनेछ ।

यस्तै अर्काे खेलमा भ्यालेन्सियाले इटालियन क्लब एटलान्टाको सामना गर्दैछ । पहिलो लेगमा ४–१ हार भोगेको भ्यालेन्सिया उत्कृष्ट प्रर्दशन गर्दै क्वाटरफाइनल पुग्ने दाउमा हुनेछ । भ्यालेन्सियालाई क्वाटरफाइनल प्रवेश गर्न कम्तीमा पनि ३–० को जित आवश्यक छ । २–० को जितले पनि भ्यालेन्सिया अघि बढ्न सक्ने छैन । यता, एटलान्टाले अघिल्लो चरण प्रवेश गर्न २–० को हार या बराबरी नै पर्याप्त हुने छ । ३–० को हारले भने अवे गोलमा एटलान्टा बाहिरिने छ ।