झापा (हाम्रो खेलकुद) – ताप्लेजुङको कर्णसिं सोनम एफसीले प्रदेश १ स्तरीय महिला फुटबल प्रतियोगिता सुखानी सहिद स्मृति गोल्डकप फुटबल प्रतियोगिता उपाधि रक्षाका लागि कनकाई नगर खेलकुद विकास समिति झापासँग प्रतिस्पर्धा गर्नेछ ।

धनकुटा जिल्ला फुटबल संघलाई बुधबार २–० गोलले हराउँदै कर्णसिं ताप्लेजुङले कनकाईसँग फाइनल भेट पक्का गरेको हो । फाइनल यात्रासँगै साविक विजेता ताप्लेजुङले कम्तिमा नगद ७५ हजार सुरक्षित गर्यो । पहिलो र दोस्रो हाफमा एक एक गोल गर्दै ताप्लेजुङले फाइनल यात्रा तय गरेको थियो ।

खेलको १५औँ मिनेटमा सुनकला राईले हेडमार्फत गोल गर्दै ताप्लेजुङलाई अग्रता दिलाएकी थिइन् । सुनकलाको हेडरलाई क्लियर गर्ने क्रममा धनकुटाकी विनिता लिम्बुबाट हेड फ्लिक भएको थियो । रोमाञ्चक खेलमा ताप्लेजुङले खेलको ५७औँ मिनेटमा युकी गुरुङले थप गोल गरेर जीत सुनिश्चित गरिन् । धनकुटाकी गोलरक्षक सुस्मिता राईको हातबाट फुत्किएको बललाई युकीले गोलपोस्टको दिशा दिएकी थिइन् ।

खेलको वुमन अफ दी म्याच ताप्लेजुङकी सुनकला राई घोषित भइन् । उनलाई प्रदेश १ का सांसद अर्जुन राई र अर्जुनधारा नगर पशुपक्षी, मत्स्य तथा कछुवा विकास शाखा प्रमुख पदमलाल राईले ३ हजार रुपैयाँ प्रदान गरे । त्यस्तै, खेलमा पहिलो गोल गर्ने सुनकलालाई स्थानीय शिवलाल गिरीले एक हजार रुपैयाँ दिए ।

महिला फुटबल खेलाडीलाई प्रोत्साहन गर्ने उद्देश्यले सुखानी सहिद स्मृति प्रतिष्ठान अर्जुनधारा–९ झापाको आयोजनामा गरिएको यस प्रतियोगिता १ नम्बर प्रदेशमै सर्वाधिक राशिको हो । गोल्डकपमा ९ जिल्लाका १० टिमको सहभागिता रहेको छ ।

गोल्डकपको विजेताले नगद १ लाख २५ हजार र दोस्रो हुने टोलीले ७५ हजार रुपैयाँ प्राप्त गर्नेछ । प्रतियोगिताको उत्कृष्ट गोलकिपर, डिफेन्डर, मिडफिल्डर र फरवार्डले समान ७ हजार रुपैयाँ प्राप्त गर्नेछन् । प्रतियोगिताको सर्वोत्कृष्ट खेलाडीले १२ हजार र फेयर प्ले टोलीले १० हजार रुपैयाँ पाउनेछ ।