एजेन्सी – इटालीको राष्ट्रिय टोली तथा स्पेनिस क्लब रियल म्याड्रिडका पुर्व फरवार्ड एन्टेनियो कसानोले म्याराडोनाभन्दा लियोनेल मेस्सी विश्वको सर्वश्रेष्ठ खेलाडी रहेको बताएका छन् । 

कसानोले इटालियन पत्रिकासँगको कुराकानीका क्रममा मेस्सीले म्याराडोनालाई सबै किसिमबाट पछि पारेको बताएका हुन् । ‘मेस्सीले आफ्नो १५ वर्षे व्यवसायिक करियरमा बार्सिलोनाबाट सबै थोक जितेका छन् । तर, एउटै कुरा उनले आफ्नो टोली अर्जेन्टिनालाई विश्वकप जिताउन सकेको छैनन् । तर, पनि खेल र प्रदर्शनको हिसाबले मेस्सी राम्रा खेलाडी हुन्,’ ३७ वर्षे कसानोले भने ।

‘म्याराडोनाले ४ देखि ५ वर्ष भन्दा बढी एकै क्लबबाट खेलेनन् । तर, मेस्सीले १५ वर्षसम्म उही स्तरमा खेल्दै आफुलाई विशवमा उत्कृष्ट रहेको प्रमाणित गरिरहेका छन् । यसलाई म्याराडोना फ्यानले स्वीकार्नुपर्ने हुन्छ ।’

मेस्सीले बार्सिलोनाका लागि ७१० गोल गर्दा ३०० असिस्ट दिएका छन् । मेस्सीले बार्सिलोना एकै क्लबबाट १० स्पेनिस ला लिगा, ६ स्पेनिस सुपर कप र ४ च्याम्पियन्स लिगको उपाधि जितेका छन् । तर, मेस्सीले आफ्नो देश अर्जेन्टिनालाई कुनै पनि ठुलो प्रतियोगिताको उपाधि जिताउन सकेका छैनन् । मेस्सीको कप्तानीमा अर्जेन्टिना दुईपटक कोपा अमेरिका कपको फाइनलमा तथा एक पटक विश्वकपको फाइनलमा चुकेको छ ।

यता, म्याराडोनाले भने १९८६ मा विश्वकप जिताए । २०१४ को विश्वकपमा अर्जेन्टिना जर्मनीसँग १–० ले पराजित भएको थियो । ३२ वर्षीय मेस्सीलाई अब एउटै चुनौतीको रुपमा विश्वकप या कोपा अमेरिका कपको उपाधि दिलाउनु रहेको कसानोले सुनाए ।

कसानोले मेस्सी म्याराडोनाभन्दा उत्कृष्ट रहेपनि आफ्ना पूर्व सहयात्री ब्राजिली रोनाल्डो अझ उत्कृष्ट रहेको बताएका छन् । ‘मलाई एक खेल याद छ जब पुरै रंगशाला रोनाल्डोको समर्थनमा गुन्जिएको थियो । हामी घरेलु मैदानमा १–० ले पछि थियौं । प्रशिक्षकले रोनाल्डोलाई निकाल्ने तयारी गरिरहँदा रोनाल्डो आफैंले १५ मिनेट कुर्नुस् मैले दुई गोल गरिन भने मलाई निकाल्नुुस,’ कसानोले सुनाए, ‘१५ मिनेटपछि रोनाल्डोले नभन्दै २ गोल गर्दै आफ्नो टोलीलाई जिताए । मैले भने कि, त्यहाँ फुटबलका भगवान छन् भने त्यो रोनाल्डो हो । त्यसपछि मेस्सी ।’