काठमाडौं (हाम्रो खेलकुद)-
नेपाली राष्ट्रिय फुटबल टोलीका प्रशिक्षक रहि सकेका बालगोपाल महर्जनको क्लब ब्रदर्श युनियनले बंगलादेश प्रिमियर लिगमा दोस्रो बराबरी खेलेको छ ।
चटगाँउको एमए अजिज रंगशालामा ब्रदर्श युनियनले शनिबार बिजेएमसीलाई १–१ बराबरीमा रोकेको थियो । दोस्रो हाफको इन्जुरी समयमा नाइजेरियन एनकोचा किङ्सलेले बराबरी गोल गरेपछि ब्रदर्शन युनियनको हार टरेको थियो । त्यसअघि १४ औं मिनेटमा मोख्लेसुन रहमानको गोलबाट बिजेएमसीले अग्रता लिएको थियो ।
गत साता सुरु भएको लिगमा ब्रदर्श युनियनको यो लगातार दोस्रो बराबरी हो । अर्को खेलमा नाइजेरियन अहमद कोलु मुसाको दुई गोलमा मुक्तिजोद्धाले आरमबाग केएसलाई ३–० ले हराएको छ । जितपछि १२ टोली सम्मिलित लिगमा मुक्तिजोद्धा शीर्ष स्थानमा पुगेको छ । महर्जनको टोलीले मंगलबार मुक्तिजोद्धा सामना गर्नेछ ।
