एजेन्सी – जापानी युवा स्टार ताकेफुसा कुबो हाल स्पेनिस ला लिगाको मालोर्कामा उत्कृष्ट प्रदर्शन गरिरहेका छन् । बार्सिलोनाको एकेडेमीमा हुर्केका कुबो यसै सिजनको सुरुवातमा रियल म्याड्रिडमा अनुबन्धित भएका थिए ।

कुबोले यस सिजन रियलको दोस्रो टोली कास्तिलाबाट खेल्ने अपेक्षा गरिएको थियो । तर उनले ला लिगामै खेल्ने निर्णय लिँदै मालोर्काको प्रस्तावलाई स्वीकार गरे । सामान्यतया रियलका खेलाडी कास्तिलाबाट खेलेर पहिलो टिममा छनोट हुन खोज्छन् । तर कुबोले आफ्नो स्तर परिक्षाकै लागि मालोर्काबाट खेल्न रोजेको बताए ।

‘रियलबाट प्रि सिजनका खेलमा मैले उत्कृष्ट खेलाडीहरुसँग मैदानमा खेल्ने मौका पाएँ । मैले त्यसबेला आफूले सोचेजस्तो प्रदर्शन गर्न सकें । त्यसले पनि मलाई निकै उर्जा दियो । मालोर्काले मलाई ला लिगामा नै खेल्ने अवसर दिने बताएपछि आकर्षित भएँ । कास्तिलामा मैले प्रशिक्षक राउलबाट धेरै सिक्ने अवसर पाएको थिएँ, तर मालोर्काको प्रस्ताव नकार्न सकिन,’ कुबोले भने ।

बार्सिलोनामा एकेडेमीमा खेलेर हुर्केका कुबोले आफू अहिले भने पूर्ण रुपमा म्याड्रिडकै खेलाडी भएको बताए । ‘ म सुरुवातमा बार्सिलोना, टोकियो र योकोहामा मारिनोजलाई धन्यवाद दिन चाहन्छु । साथसाथै मालोर्का र मेरा सम्पूर्ण सहकर्मी साथीहरुलाई पनि । मेरा प्रशिक्षक जसले मलाई यहाँसम्म ल्याउनुभयो, सबैलाई धन्यवादभन्न चाहन्छु । म १८ वर्ष पुगेपछि मेरो अगाडी धेरै विकल्प थियो । म्याड्रिडले पनि प्रस्ताव अगाडी सारेको थियो र मैले त्यहि रोजें । म खुसी छु कि म अब पूरै म्याड्रिडकै खेलाडी भएको छु,’ उनले थपे ।

‘रियल म्याड्रिडबाट प्रि सिजनको प्रदर्शनले निकै उर्जा थपेको कुबोले अनुभव साटे । ‘मलाई धेरै मान्छेको सहयोग मिलेको कारण नै मैले एकदम चाँडो खेलमा जम्न सकें । खेलाडी सहकर्मी र प्रशिक्षक टोली, विशेषगरि जिदानको निकै सहयोग मिल्यो । जिदानले निकै सुक्ष्म ढंगले खेल अध्ययन गरेर मलाई निकै प्रश्न गर्नुभएको थियो,’ कुबोले सुनाए ।

कुबोले आफ्नो खेल्ने शैली र आफूलाई सहज लाग्ने खेल्ने पोजिसनबारे चर्चा गर्दै अन्तर्वार्ता अन्त्य गरे । ‘टोलीले कस्तो रणनीति अपनाएको छ, त्यहिअनुसार मैले खेल्ने हो । मालोर्कामा मैले राइट विंगरको रुपमा खेलिरहेको छ । मेरो खेल्ने शैली भने स्ट्राइकर पछाडी आक्रामक मिडफिल्डरको रुपमा सुहाउँदो छ । मैले त्यसो हुँदा बल लिने, ड्रीबल गर्ने, पास र सुट सबै गर्ने विकल्प हुन्छ । तर राइट विंगमा पनि मलाई सहजै लागेको छ,’ उनले टुंग्याए ।

यसअघि सिजनको सुरुवातमा जापानका १८ वर्षीय ताकेफुसा कुबोलाई क्लबमा ल्याउन बार्सिलोना र रियलले नै अन्तरिक तयारीमा थालेका थिए । देशबाहिरका खेलाडीलाई १८ वर्ष नपुग्दै अनुबन्धन गर्न नपाइने हुँदा बार्सिलोना यसअघि पनि समस्यमा परिसकेको थियो । यसै वर्ष जुनमा १८ वर्ष पूरा भएपछि रियलले कुबोलाई अनुबन्धन गरेको थियो ।

रियल र बार्सिलोनासँगै पीएसजीले पनि पछिल्लो समय ताकेका एजेन्टलाई सम्पर्क गरेको थियो । तर कुबोले रियललाई नै आफ्नो रोजाइमा राखेका थिए । यसअघि बार्सिलोनाले कुबोलाई उमेर नपुग्दै भित्र्याउँदा फिफाले कारवाही गरेको थियो । त्यसबेला उनले बार्सिलोनामा ३ वर्ष बिताउँदै उमेर समूहमा खेलेका थिए । कारवाहीपश्चात उनी जापान फर्केर त्यहाँको शीर्ष डिभिजनको लिग खेले ।

कुबो आक्रामक मिडफिल्डमा खेल्दै गोल गर्ने अवसर सिर्जना गर्न माहिर मानिन्छन् । उनले आफ्नो उमेर समूहमा उत्कृष्ट प्रदर्शन गर्दै आएका छन् । प्राविधिक रुपमा निपुण ताकेले १६ वर्षको उमेरमा नै जापानको यू-२० टोलीबाट खेलिसकेका थिए ।