एजेन्सी – विश्व फुटबल कोरोना भाइरस संक्रमणका कारण ठप्प छ । कतिपय देशले २०१९-२० सिजन रद्द गरिसकेका छन् भने केहि लिगले लिग सुचारु गर्न अन्तिम प्रयास जारि राखेका छन् । यस्तोमा अर्को सिजनको तयारीका लागि ट्रान्सफर बजारमा हलचल पनि सुरु भएको छ ।

कोरोना संक्रमणका कारण लगभग सबै क्लबलाई आर्थिक रुपमा निकै समस्या पर्ने देखिन्छ । लिग रद्द भएसँगै टेलिभिजन प्रसारण अधिकार, प्रायोजन, टिकट लगायत पक्षमा आम्दानी भएको छैन । यसले क्लबका खेलाडीहरुको तलब कटौतीदेखि सम्झौता नै पुनर्विचार गर्नुपर्ने सम्मका अवस्था देखिएका छन् । क्लबहरुले पूर्व योजना अनुसार खेलाडी अनुबन्ध गर्ने सम्भावना पनि निकै कम छ ।

स्पेनिस महारथी रियल म्याड्रिडको हकमा भने अन्य टोलीजस्तो स्थिति चिन्ताजनक छैन । रियल म्याड्रिडसँग हाल क्लबमा र बाहिर लोनमा पनि पर्याप्त खेलाडी रहेको हुनाले टोली निर्माण मात्र नभएर बजारमा बेच्नका लागि पनि खासै समस्या देखिन्न । खेलाडी संख्या धेरै हुनाले पनि चाहेको खेलाडी अनुबन्ध गर्न साटफेरका लागि विकल्प रहन्छ ।

अहिलेकै अवस्था हेर्दा अर्को सिजन रियलसँग सिनियर टोलीमा नै ३६ खेलाडी रहनेछ । अर्को सिजनको सुरुवात गर्दा क्लबले बेच्ने, लोनमा पठाउने अथवा साटफेर गरेर १५ खेलाडी बाहिर पठाउनु पर्ने हुन्छ । यसले क्लबलाई आम्दानी त हुन्छ नै, ति खेलाडीको तलबको पनि चिन्ता हट्नेछ ।

खेलाडीको अवस्था

मिडफिल्डर हामेस रोड्रीग्वेज, ग्यारेथ बेल र ब्राहिम डियाज तथा फरवार्ड मारियानो डियाजको भविष्य अब रियलमा नरहने पक्काजस्तै छ । प्रशिक्षक जिनेदिन जिदानले यी खेलाडीलाई जारि सिजन आफ्नो मुख्य योजनामा समावेश गरेका छैनन् । त्यसैले यी खेलाडीले अन्यत्र विकल्प खोज्न थालिसकेका छन् ।

सँगसँगै हाल लोनमा अन्यत्र रहेका केहि खेलाडीको अर्को सिजन रियलको पहिलो टोलीमा नै सम्भावना रहेको छ । मिडफिल्डर मार्टिन ओडेगार्डले यस सिजन रियल सोसीडाडमा निकै राम्रो प्रदर्शन गरेका छन् । दुई वर्षको लोन सम्झौता भएपनि ओडेगार्डको प्रदर्शनले गर्दा जिदानले उनलाई एकै वर्षमा रियलको टोलीमा स्थान दिने सम्भावना रहेको छ ।

अक्रफ हाकिमीले पनि बोरुसिया डर्टमुन्डमा लगातार पहिलो रोजाइमा खेल्दै आएका छन् । उनले दुवै विंगब्याकमा खेल्न सक्ने भएकाले पनि रियलमा उनको सम्भावना देखिन्छ । ड्यानी सेबालोस र रेगुइलोनको हकमा भने रियलले उनीहरुलाई अन्य क्लबसँग खेलाडी साटफेरको लागि विकल्पका रुपमा प्रयोग गर्न सक्छ ।

ओस्कार रोड्रीग्वेज, जेसस भालेहो, बोर्जा मायोराल र ताकेफुसा कुबो भने अर्को सिजन पनि लोनमा नै रहने सम्भावना छ । कुबोको हकमा रियलले उनलाई अझै ला लिगामा नै केहि अनुभव बटुलेर मात्र आफ्नो सिनियर टोलीमा अवसर दिन सक्छ । प्रिसिजनको प्रदर्शन हेर्न यसपटक न्यून सम्भावना रहेकाले पनि यी खेलाडी पुन: लोनमा जाने सम्भावना बढेको हो ।

हाल सिनियर टोलीमा नै रहेका डिफेन्डर मार्सेलो पनि अन्यत्र जान सक्छन् । फ्रान्सेली डिफेन्डर फर्लान्ड मेन्डीले उनको पोजिसनमा लगातार राम्रो प्रदर्शन गरेका कारण मार्सेलोले अन्य क्लबमा भविष्य खोज्ने सम्भावना रहेको हो । यसै सिजन क्लबमा आएका रेनिएर जेसस पनि लोनमा नै अन्यत्र जानेछन् ।

चिर परिचित प्रतिद्वन्द्वी बार्सिलोना र सहरी प्रतिद्वन्द्वी एटलेटिको म्याड्रिडको अवस्था रियलको तुलनामा केहि कमजोर छ । आर्थिक रुपमा पनि दुवै टोलीलाई हाल समस्या परेको छ । त्यसैले रियलले यसको फाइदा उठाउँदै आफूले चाहेका खेलाडी केहि कम मूल्यमा अनुबन्धन गर्न सक्छ । एर्लीङ हालान्ड, एडुआर्डो कामाभिंगा र पल पोग्बाको नाम लगातार बर्नाबाउसँग जोडिदै आएको छ ।