काठमाडौं (हाम्रो खेलकुद) –कोरोना भाइरस (कोभिड–१९) को कारण उत्पन्न परिस्थितिलाई मध्यनजर गर्दै अखिल नेपाल फुटबल संघ (एन्फा) आफ्ना सदस्य संस्थाहरुलाई राहत वितरण गर्न ३ सदस्यीय राहत तथा सहयोग समन्वय समिति गठन गरेको छ ।

एन्फाको बुधबार बसेको भिडियो कन्फरेन्स बैठकले स्वास्थ्य समितिका संयोजक समेत रहेका एन्फा केन्द्रिय सदस्य रत्न कुमार श्रेष्ठको संयोजकत्वमा ३ सदस्यीय राहत तथा सहयोग समन्वय समिति गठन गरेको हो । समितिको सदस्यमा उत्तम कुमार भण्डारी र रुपेश अधिकारी छन् ।

एन्फाको बैठकले संघमा आबद्ध सम्पुर्ण सदस्य संस्थाहरु (जिल्ला फुटबल संघ, ए, बी र सी डिभिजनका क्लब, खेलाडी, रेफ्री, प्रशिक्षक, महिला संघ) संकटग्रस्त फुटबलकर्मीको सुची निर्धारण गरी सचिवालयमा बुझाउने र सचिवालयमा प्राप्त भएको ५ दिन भित्र सुचीलाई आवश्यक प्रमाणिकरण गरी राहत तथा सहयोग उपलब्ध गराउने जनाएको छ ।

विश्वमा लाखौ मानिसहरु संक्रमित भएसँगै नेपालमा पनि क्रमिक रुपमा संक्रमितहरुको संख्या बढिरहेको अवस्थामा नेपाल सरकारले लकडाउन (बन्दाबन्दी) गरेको छ । यसले नेपालमा फुटबल गतिविधि स्थगित हुँदा खेलेर अनि खेलाएरै जीविकोपार्जन गर्छु भन्ने खेलाडी, रेफ्री र प्रशिक्षकलगायत अन्य फुटबलकर्मी प्रभावित भएको विज्ञप्तिमा उल्लेख छ ।

त्यस्तै विज्ञप्तिमा विश्वभरीका फुटबलकर्मीहरु एक परिवारको रुपमा सामुहिक गतिविधि गर्दै आएको हुनाले विश्व फुटबल महासंघ (फिफा) बाट पनि यो अवस्थामा आफ्दा सदस्य संघहरुलाई सहयोग गर्न कटिबद्ध रहेको अवस्थामा नेपालका फुटबल कर्मीहरुलाई आइपरेको समस्या वा संकट पहिचान गरि एन्फाले आवश्यक राहत वा सहयोग गर्न एन्फा तयार रहेको उल्लेख छ ।

एन्फालाई यसअघि फिफाले कोरोनाबाट निम्तिने आर्थिक संकट टार्न ५ लाख अमेरिकी डलर (६ करोड रुपैयाँ) सहयोग गरेको छ । त्यस्तै फिफाले सन् २०१९ र २०२० को फिफा फरवार्ड कार्यक्रम लगायत अन्य शीर्षकमा आउने अनुदान पनि तुरुन्त उपलब्ध गराउने बताएको छ ।