काठमाडौं (हाम्रो खेलकुद) – मुखिया कान्छा गुरुङको अध्यक्षतामा लक्ष्मी हुन्डाई मनाङ मस्र्याङदी क्लबको १५ सदस्यीय कार्यसमिति हालै चयन भएको छ । राजधानीमा सोमबार आयोजित कार्यक्रममा निर्वतमान अध्यक्ष जिमी गुरुङले निर्वाचित कार्यसमितिका पदाधिकारी एवंम् सदस्यलाई खादा लगाइ बधाई दिएका थिए ।
नेपाली फटबल इतिहासमा सर्वाधिक ७ पटक ए डिभिजन लिग जितेको मनाङको कार्यसमितिको कार्यकाल दुई बर्षको रहने व्यवस्था छ । क्लबको उपाध्यक्षमा मुखिया गुरुङ , छिरिङ फुन्जो गुरुङ, चोल्पा गुरुङ छन् । मुखिया लामाले महासचिव, बिजय घलेले सचिव, सोनाम गुरुङले कोषाध्यक्ष, पेमा टासी गुरुङ र छिरिङ घलेले सह कोषाध्यक्षको जिम्मेवारी पाएका छन् ।
त्यस्तै पूर्व अध्यक्ष टासी घले, कप्ली गुरुङसहित पेम्बा गुरुङ, सोनाम पि गुरुङ, कर्मा गुरुङ र धनबहादुर गुरुङ सदस्य चुनिएका छन् । सोही अवसरमा अलिख नेपाल फुटबल संघ (एन्फा) को कात्तिक ८ गतेका लागि तय भएको साधारण सभामा क्लबका तर्फबाट मताधिकारसहित सदस्य टासी घलेलाई मनोनयन गरेको जानकारी दिएको थियो । घलेले एन्फा अध्यक्षमा उम्मेदवारी दिने पनि सोही अवसरमा घोषणा गरे ।
राष्ट्रिय खेलकुद परिषद् (राखेप) का सदस्य सचिव केशवकुमार विष्ट र एन्फाका कार्यवहाक अध्यक्ष नरेन्द्र श्रेष्ठले मनाङ नयाँ कार्यसमितिको कार्यकालको सफलताका लागि शुभकामना दिए ।
राखेप सदस्य सचिव विष्टले भूगोल र सौन्दर्यको प्रतिनिधित्व गर्ने मनाङ मस्र्याङ्दी नाम नै आफुलाई असाध्यै मन पर्ने चर्चा गर्दै भने, ‘यो क्लबले अझै प्रगति गरोस् । नेपाली फुटबलको एउटा चम्किलो तारा बनोस् ।
एन्फा कार्यवहाक अध्यक्ष श्रेष्ठले मनाङको गौरवशाली इतिहास रहेको उल्लेख गर्दै अझै सफलता मिलोस् भन्ने शुभकामना दिए ।
