काठमाडौं (हाम्रो खेलकुद)– एएफसी ए कोचिङ कोर्स उतिर्ण गर्ने ८ नेपाली प्रशिक्षक र हालै ओलम्पिकमा सहभागी भएर फर्केका आर्चरी खेलाडी जितबहादुर मोक्तानलाई लक्ष्मी हुन्डाई मनाङ मस्र्याङ्दीले सोमबार सम्मान गरेको छ ।
क्लबको नयाँ कार्यसमितिको परिचयात्मक कार्यक्रममा मनाङले उनीहरुलाई सम्मान गरेका हुन् । क्लबका अध्यक्ष मुखिया कान्छा गुरुङले ए कोचिङ कोर्स उर्तिण र जितबहादुरलाई सम्मान पत्रसहित क्लबको ट्रयाकसुट प्रदान गरे । ८ मध्ये अधिकांश कुनै न कुनै समय मनाङमा खेलाडी वा प्रशिक्षकमा रहि सकेका छन् । केही महिना अघि कोचिङ कोर्स उतिर्ण गर्नेमा बालगोपाल महर्जन, उपेन्द्रमान सिंह, हरि खड्का, मनाङका प्रशिक्षक छिरिङ लोप्साङ, राजेन्द्र तामाङ, कुमार थापा, नवीन न्यौपाने र रविन्द्र सिलाकार छन् ।
मनाङका सदस्य टासी घलेले क्लबलाई यहाँ सम्म पुर्याउनमा निर्वतमान अध्यक्ष जिमी गुरुङको महत्वपूर्ण भूमिका रहेको चर्चा गर्दै क्लब परिवारको तर्फबाट धन्यवाद दिए । ए कोचिङ कोर्स उतिर्ण गर्ने बधाई दिदै घलेले भने,‘ हरि खड्का बाहेक सबैले क्लबबाट कुनै समय खेलाडी वा प्रशिक्षकका रुपमा भूमिका निर्वाह गरिसकेका छन् । अब हरिलाई प्रशिक्षक बनाउनुपर्ला जस्तो छ ।’ उनले खड्कालाई प्रशिक्षक बनाउने बताइरहँदा हल हासोले गुन्जायमान भएको थियो ।
२४ जनाले भाग लिएको ए कोचिङ कोर्समा ८ जना उतिर्ण भएका थिए ।
