एजेन्सी – यूईएफए युरोपा लिग अन्तर्गत छनोटको दोस्रो चरणको प्लेअफ खेलमा इंग्लिस प्रिमियर लिगको टोटेनहम हट्सपरले बुल्गेरियाको लोकोमोटिभ प्लोभडिभलाई २-१ ले पराजित गरेको छ ।

बुल्गेरियाको टोलीविरुद्ध आफ्नो पहिलो रोजाईको सुरुवाती ११ उतारेको टोटेनहमले बल पोसेसनमा पकड जमाएपनि अग्रता लिन भने सकेको थिएन । पहिलो हाफमा स्टिभन बर्गवाइनको प्रहार क्रसबारमा लागेर फर्कंदा पाहुना टोली अगाडि बढ्न सकेन । प्लोभडिभले पहिलो हाफमा स्पर्सका गोलरक्षक एवं कप्तानलाई कुनै समस्या दिएन ।

दोस्रो हाफमा पनि आफ्नो आक्रमण जारी राखेको टोटेनहमले प्लोभडिभका गोलरक्षकलाई बिट गर्न निकै कसरत गर्यो । तर खेलमा दबाब बनाएपनि टोटेनहम ७१ औं मिनेटमा पछाडी पर्यो । घरेलु टोलीका लागि जिओर्जी मिन्चेभले गोल गर्दै मोउरिन्होको टोलीलाई स्तब्ध पार्ने संकेत दिए । कर्नरमा आएको बललाई डिमिटार इलिएभले फ्लिक गरेपछि मिन्चेभले हेडरमार्फत गोल गरेका थिए ।

त्यसको ८ मिनेटपछि नै टोटेनहमले खेलमा फर्कने अवसर पायो । डिनिस अल्मेडाले पोस्टतर्फ गएको बललाई हातले रोकेपछि रेफ्रीले रातो कार्ड दिए । लगत्तै रेफ्रीको निर्णयमा अपात्ति जनाएपछि बिर्सेन्ट कारागारेनले दोस्रो पहेंलो कार्ड पाए । पेनाल्टीमा ह्यारी केनले गोल गर्दै खेल बराबरीमा ल्याए ।

दुई रातो कार्डका कारण ९ खेलाडीमा समेटिएको प्लोभडिभले त्यसपछि पूर्ण रक्षात्मक रणनीति अपनायो । तर ८५ औं मिनेटमा लुकास मोउराको पासमा वैकल्पिक खेलाडी टान्गी एनडोम्बेलेले गोल गर्दै खेलमा टोटेनहमलाई अग्रता दिलाए ।

थप गोल हुन नसकेपछि टोटेनहम अगाडी बढेको छ । टोटेनहमले अब तेस्रो चरणमा म्यासेडोनियाको स्केन्दिजासँग प्रतिस्पर्धा गर्नेछ ।