गोरखा (हाम्रो खेलकुद) – कोभिड १९ का कारण पटक पटक लकडाउनका कारण स्थगित एस्ट्रो टर्फ (क्रितिम घाँसे मैदान) निर्माण पुनः सुरु हुने भएको छ ।

द ओसन क्लबले गोरखा नगरपालिका ९ दलभञ्ज्याङस्थित प्रशिक्षण मैदानको स्तरोन्नती गरि टर्फ बिच्छ्याउने योजना अनुसार गत मंसिरबाट काम थालेको थियो । पूर्वाधारको ७० प्रतिशत काम सम्पन्न भइसकेको क्लबले जनाएको छ ।

कोरोनाको संक्रमण नियन्त्रणमा नआएपछि सामाजिक दुरी र अन्य मापदण्ड पूरा गर्दै काम पुनः सुरु गर्ने र दशैं अघिनै यो काम सम्पन्न गर्ने लक्ष्य रहेको क्लबले जनाएको छ ।

४४ मिटर लम्बाई र २३ मिटर चौडाई क्षेत्रफल भएको टर्फका लागि मैदान सम्याउने, ड्रेनेस निर्माण, , टर्फ राख्नको लागि आवश्यक पर्ने गिटी र बालुवा राख्ने काम सकिएको र अब टर्फ बिछ्याएर मैदान तयार गर्ने क्रममा रहेको क्लबका अध्यक्ष अमित खत्रीले बताए ।

मैदानका लागि ३१ लाख रुपैयाँ भन्दा बढी खर्च गर्ने अनुमान गरिएको थियो । गण्डकी प्रदेश सरकारको निर्वाचन क्षेत्र पूर्वाधार विकास कार्यक्रम अन्तर्गत आर्थिक वर्ष २०७६/७७ मा ८ लाख रुपैयाँ उपलब्ध गराएको थियो ।

गोरखा नगरपालिकाले आर्थिक वर्ष २०७७/७८ को बजेटमार्फत १० लाख रुपैयाँ र वडा नं ९ ले २ लाख रुपैयाँ विनियोजन गरेको थियो । पालुङटार नगरपालिकाले मैदान स्तरोन्नतीका लागि आवश्यक पर्ने गिटी, बालुवा उपलब्ध गराएको क्लबले जनाएको छ ।

बेल्जियममा रहेका गोरखाको मान्बुका राम घलेले ५० हजार रुपैयाँ तथा विदेशामा रहेको अन्इबाट झन्डै २ लाख रुपैयाँ सहयोग प्राप्त भएको क्लबले जनाएको छ । पहिलो चरणको काम सम्पन्न गर्न अझै ९ लाख रुपैयाँ भन्दा बढी नपुग देखिएकोले सहयोगका लागि क्लबले आव्हान पनि गरेको छ ।