एजेन्सी – पोर्चुगिज फरवार्ड डिओगो जोटाले लगातार तेस्रो खेलमा गोल गरेपछि इंग्लिस च्याम्पियन लिभरपुलले प्रिमियर लिग अन्तर्गत शनिबार वेस्ट ह्याममाथि २-१ को जित दर्ता गरेको छ ।

खेलको सुरुवाती समयमा नै पछि परेको लिभरपुलले पुनरागमन गर्दै जित हासिल गर्दा अंक तालिकाको शीर्षस्थानमा ३ अंकको अग्रता बनाउन सफल भयो । खेलको दशौं मिनेटमा नै वेस्ट ह्यामले अग्रता लिएको थियो । डिफेन्डर जो गोमेजले क्लियर गरेको बललाई नियन्त्रणमा लिँदै पाब्लो फोर्नाल्सले गोल गरेपछि पाहुना टोली अघि बढेको थियो ।

पहिलो हाफको अन्त्यतिर लिभरपुलले पेनाल्टी प्राप्त गरेपछि खेलमा फर्कने बाटो पाएको थियो । आर्थर मासुआकुले मोहमद सलाहलाई पेनाल्टी क्षेत्रभित्र लडाएपछि रेफ्रीले पेनाल्टी दिएका थिए । सलाहले उक्त पेनाल्टीको सदुपयोग गर्दै खेल बराबरीमा ल्याए ।

निर्धारित समयको ५ मिनेट बाँकी रहँदा लिभरपुलले अग्रता लियो । बेन्चबाट आएका जेर्डान शाकिरी र जोटाको जोडी चल्दा घरेलु टोली अघि बढेको हो । ७० औं मिनेटमा प्रवेश गरेका यी दुईले पछिल्ला खेलमा पनि प्रभाव जमाएका थिए । शाकिरीको थ्रु बललाई जोटाले गोलमा परिणत गर्दै जिततर्फ उन्मुख गराएका थिए ।

मुख्य डिफेन्डरहरु चोटका कारण बाहिर रहेकाले लिभरपुलले युवा डिफेन्डर नाथन फिलिप्सलाई डेब्यु दिएको थियो । टोलीमा पहिलो रोजाइमा खेल्दै आएका भर्जिल भान डाइक, जोएल माटिप र फबिन्हो तीनै जना घाइते छन् । फिलिप्सले सन्तोषजनक प्रदर्शन गर्दा प्रशिक्षक योर्गेन क्लोपलाई केहि राहत पुगेको छ ।

जितसँगै लिभरपुलको ७ खेलमा १६ अंक पुगेको छ । टोली दोस्रो स्थाको एभर्टनभन्दा ३ अंकले अघि छ । वेस्ट ह्याम भने ८ अंकका साथ १३ औं स्थानमा छ ।