एजेन्सी – फ्रान्सेली फरवार्ड किलियन एमबाप्पेको उत्कृष्ट प्रदर्शनसँगै पेरिस सेन्ट जर्मेन (पीएसजी) ले नान्टसलाई पराजित गरेको छ । एमबाप्पेले एक गोल र एक असिस्ट दिँदा पीएसजी ३-० ले विजयी भयो ।

घरेलु टोलीले पहिलो हाफमा अग्रता लिने सुवर्ण अवसर गुमाएपछि दोस्रो हाफमा पीएसजीले खेल आफ्नो पक्षमा पारेको थियो । सिमोनले खालि पोस्टमा गोल गर्न नसक्दा नान्टस अग्रता लिन चुकेको थियो । नेयमारको अनुपस्थितिमा उत्रिएको पीएसजी आक्रमणमा चुस्त नहुँदा पहिलो हाफको खेल गोलरहित बराबरीमा टुंगिएको थियो ।

दोस्रो हाफको सुरुवातमै पीएसजीले आन्दर हरेराको गोलमा अग्रता लियो । एमबाप्पेले ६ यार्ड बक्स नजिकबाट दिएको पासलाई हरेराले पहिलो टचमा नै गोल गरेका थिए । ६५ औं मिनेटमा एमबाप्पेलाई पेनाल्टी क्षेत्रभित्र लडाएपछि पाएको पेनाल्टीमा उनी आफैंले गोल गर्दै २-० को अग्रता दिलाए ।

नान्टसले पनि त्यसको केहि मिनेटमा नै पेनाल्टी पाएको थियो । तर काडेर बाम्बाको पेनाल्टीलाई पीएसजीको कप्तानी गरिरहेका केलर नाभासले विफल पारे । खेलको २ मिनेट समय बाँकी रहँदा नान्टसको पेनाल्टी क्षेत्रभित्र बल खोस्दै पाब्लो सारबियाले गोल गरे ।

यस जितसँगै पीएसजीले लिगको शीर्षस्थानमा ३ अंकको अग्रता बनाएको छ । पीएसजीको ९ खेलमा २१ अंक छ । दोस्रो स्थानको लिलको ८ खेलमा १८ अंक रहेको छ ।