एजेन्सी – इटालियन च्याम्पियन युभेन्टसले इटालियन सिरी ए अन्तर्गत आइतबार स्पेजियाको सामना गर्दैछ । खेल नेपाली समयानुसार साँझ ७:४५ बजे सुरु हुनेछ ।

प्रशिक्षक आन्द्रीए पिर्लोले उक्त खेलका लागि आफ्ना स्टार फरवार्ड क्रिस्टियानो रोनाल्डोलाई टोलीमा समेट्ने बताएका छन् । यसै साता कोरोना संक्रमणबाट मुक्त भएका रोनाल्डो बेन्चमा रहने पिर्लोले संकेत दिएका छन् । रोनाल्डो अक्टोबर पहिलो साता पोर्चुगलसँग अन्तर्राष्ट्रिय खेलका दौरान कोरोनाबाट संक्रमित भएका थिए ।

रोनाल्डोले सेप्टेम्बर अन्त्यमा रोमासँग २-२ को बराबरी भएको खेलपछि युभेन्टसका लागि खेलेका छैनन् । रोनाल्डोले बेन्चबाट वैकल्पिक खेलाडीका रुपमा खेल्ने सम्भावना रहेको छ । झन्डै ३ साता विश्राम पाएका कारण पनि उनले सिधै पूरा ९० मिनेट नखेल्ने पिरलोले बताएका हुन् ।

‘रोनाल्डोले दोस्रो नेगेटिभ परिक्षण गरेपछि शनिबार एक्लै प्रशिक्षण गरे । उनी आइतबार टोलीमा रहनेछन् । मलाई लाग्दैन उनले सुरुवाती रोजाइमा खेल्नेछन् । हामीलाई उनको उपस्थिति नै ठूलो पक्ष हो । उनले घरमा रहँदा पनि प्रशिक्षण गरेकाले टोलीमा भने रहनेछन्,’ पिर्लोले भने ।

रोनाल्डोको अनुपस्थितिमा अल्भारो मोराटा र पाउलो डिबालाले टोलीको आक्रमण सम्हाल्नेछन् । स्पेजियाले जारी सिजन ५ खेलमा ५ अंक मात्र जोडेको छ । अपराजित युभेन्टसले भने ५ खेलमा २ जित र ३ बराबरीसँगै ५ अंक जोडेको छ । अंक तालिकामा युभेन्टस शीर्ष ४ बाहिर छैटौं स्थानमा छ ।