एजेन्सी – इंग्लिस प्रिमियर लिगमा साउथह्याम्टनले एस्टन भिल्लामाथि रोमाञ्चक जित हात पारेको छ । साउथह्याम्टनले भिल्लामाथि उसकै मैदानमा ४–३ को रोमाञ्चक जित निकालेको हो ।

भिल्लापार्कमा आइतबार साँझ ६१ मिनेटसम्म ४–० को आरामदायी अग्रता लिएको साउथह्याम्प्टनले त्यसपछि लगातार तीन गोल खाएपछि खेल निकै रोमाञ्चक मोडमा पुगेपनि साउथह्याम्प्टन विजयी हुन सफल भयो ।

साउथह्याम्पटनको जितमा जेम्स वाड प्रौजले दुई तथा जान्निक भेस्टेरगार्ड र ड्यानी इंग्सले समान एक गोल गरे । घरेलु टोलीका टेरोन मिङ्स, ओली वाट्किन्स र ज्याक ग्रेयलिसले गोल गरेपनि टोलीको हार टार्न सकेनन् ।

२०औं मिनेटमा जान्निक भेस्टरगार्डले गोल गर्दै साउथह्याम्टनलाई अग्रता दिलाए । ३३औं मिनेटमा जेम्स वार्डले गोल गर्दै अग्रता दोब्बर पारे । ४५औं मिनेटमा जेम्स वार्डले व्यक्तिगत दोस्रो गोल गरेपछि साउथह्याम्प्टनले पहिलो हाफमा ३–० को आरामदायी अग्रता लिएको थियो ।

५८औं मिनेटमा ड्उानी इंग्सले गोल गरेपछि साउथह्याम्प्टनले खेलमा ४–० को आरामदायी अग्रता बनाएको थियो । ६२औं मिनेटमा टेरोन मिङ्सले ज्याक ग्रेयलिसको पासमा गोल गर्दै घरेलु टोलीलाई खेलमा फर्काउने संकेत दिए ।

इन्ज्युरी समयको थप गरिएको तेस्रो मिनेटमा ओली वाट्किन्सले पेनाल्टीमार्फत गोल गर्दै खेललाई ४–२ को अवस्थामा ल्याए । इन्ज्युरी समयको थप गरिएको सातौं मिनेटमा ज्याक ग्रेयलिसले गोल गर्दै खेललाई ४–३ को अवस्थामा ल्याएपनि हार टार्न सकेनन् ।

प्रिमियर लिगमा भिल्लाको यो लगातार दोस्रो हार हो । यसअघि भिल्ला लिड्स युनाइटेडसँग ३–० ले पराजित भएको थियो । जितसँगै साउथह्याम्पटनको ७ खेलबाट १३ अंक पुगेको छ । ६ खेल खेलेको भिल्लाको १२ अंक छ ।