एजेन्सी – स्पेनिस महारथी रियल म्याड्रिडलाई पछि पार्दै रियल सोसिडाड स्पेनिस ला लिगाको शीर्षस्थानमा उक्लिएको छ ।

आइतबार राति भएको खेलमा सेल्टा डि भिगोमाथि ४–१ को सानदार जित निकाल्दै सोसिडाड ला लिगाको शीर्षस्थानमा उक्लिएको हो । जितपछि सोसिडाडको ८ खेलबाट १७ अंक पुगेको छ । एक खेल कम खेलेको रियलको १६ तथा दुई खेल कम खेलेको एट्लेटिको म्याड्रिडको १४ अंक छ । पराजित सेल्टा ६ अंकसहित पुछारमा छ ।

एबांका बलाईडोस भिगोमा घरेलु टोलीमाथिका जितमा सोसिडाडका विलियम जोशले दुई तथा डेभिड सिल्भा र मिकेल ओयरजावाललले समान एक गोल गरे । घरेले टोलीका इगो आस्पासले एक गोल फर्काए ।

खेलको ३४औं मिनेटमा डेसभड सिल्भाको गोलबाट सोसिडाडले अग्रता लिएको थियो । ३४औं मिनेटमा मिकेल ओयरजावालले गोल गर्दै सोसिडाडलाई पहिलो हाफमा २–० को अग्रता दिलाए । ५४औं मिनेटमा विलियम जोशले गोल गर्दै सोसिडाडलाई फराकिलो जिततर्फ अघि बढाए ।

७७औं मिनेटमा इगो आस्पासले पेनाल्टीमार्फत गोल गर्दै खेललाई ३–१ को अवस्थामा ल्याए । ८१औं मिनेटमा विलियम जोशले गोल गर्दै सोसिडाडलाई ४–१ को सहज जित दिलाए ।

इन्ज्युरी समयको थप गरिएको तेस्रो मिनेटमा जोश फोन्टन दोहोरो पहेँलो कार्ड खादै मैदानबाट बाहिरिएपछि घरेलु टोलीले १० खेलाडीमा समेटिएर खेलको अन्त्य गरेको थियो ।

ला लिगामा सोसिडाडको यो पाँचौ जित हो । सोसिडाडले दुई बराबरी र एक हारको नतिजा निकालेको छ ।

अन्य नतिजा
रियल बेटिसविरुद्ध इल्चे (३–१), ग्रानडाविरुद्ध लेभान्टे (१–१), भ्यालेन्सियाविरुद्ध गेटाफे (२–२)