एजेन्सी – इंग्लिस प्रिमियर लिगमा आज सोमबार राति लेस्टर सिटी र लिड्स युनाइटेडबीच प्रतिस्पर्धा हुँदैछ ।

खेल एलन रोड लिड्स वेस्ट योर्कसायरमा नेपाली समयअनुसार राति १ः४५ बजे हुनेछ । घरेलु मैदानमा लिड्स लेस्टरलाई पराजित गर्दै अंक तालिका सुधार गर्ने दाउमा हुनेछ ।

लिड्स ६ खेलबाट १० अंक जोडेर १२औं स्थानमा रहेको छ । लेस्टरलाई हराए लिड्सलाई तेस्रो स्थानमा उक्लने अवसर छ । बराबरी या हारले लिड्स तेस्रो स्थानमा उक्लने सम्भावना रहनेछैन । त्यसैले पनि लिड्स लेस्टरविरुद्ध ३ अंककै लागि खेल्नेछ ।

लिड्ससँग प्याट्रिक बामफोर्ड, रोड्रिगो, ज्याक ह्यारिसन, हेल्डर कोस्टा, माटेज क्लिच, रोविन कोच, लुकी एयलिङ र गोलरक्षक इलान मेसलिएर रहेका छन् । बामफोर्डले यो सिजन ६ खेलमा ६ गोल गर्नुका साथै एक असिस्ट दिएका छन् । त्यसैले बामफोर्ड नै टोलीको हतियार हुनेछन् ।

यता, लेस्टर पनि घरेलु टोलीलाई पराजित गर्दै दोस्रो स्थानमा उक्लने दाउमा हुनेछ । आठौं स्थानका रहेको लेस्टको ६ खेलबाट १२ अंक रहेको छ । लिड्सलाई हराए लेस्टरले टोटेनहम, एभर्टन, साउथह्याम्टन, वल्भ्स, चेल्सी र एस्टन भिल्लालाई पछि पार्नेछ ।

लेस्टरसँग जेमी भार्डी, हार्भे बार्नेस, डेनिस प्रायट, जोन इभान्स, वेस्ली फोफाना, क्रिस्टियन फुच र गोलरक्षक कास्पर स्माइकलको साथ रहेको छ । यि दुई टोली २०१७ पछि पहिलोपटक भिड्न लागेका हुन् ।

त्यतिबेला इएफएल कपमा लेस्टर ३–१ ले विजयी भएको थियो । यि दुई टोली हालसम्म १० पटक प्रतिस्पर्धा गर्दा लेस्टर ५ खेलमा विजयी हुँदा लिड्सले दुई खेलमा सफलता हात पारेको छ । ३ खेल बराबरीमा सकिएको छ ।

प्रिमियर लिगमा आज राति नै फुलहम र वेस्ट ब्रुमबीच राति ११:१५ बजे प्रतिस्पर्धा हुँदैछ । खेल फुलहमको मैदानमा हुनेछ ।