एजेन्सी – यूईएफए च्याम्पियन्स लिगको समूह चरणको तेस्रो खेलमा आज राति इटालियन क्लब एटलान्टाले इंग्लिस क्लब लिभरपुलको सामना गर्दैछ । खेल बरगामोमा नेपाली समयअनुसार राति १ः४५ बजे हुनेछ ।

यि दुई टोली कुनै पनि प्रतिस्पर्धामा पहिलोपटक भिड्न लागेका हुन् । घरेलु टोली एटलान्टा इंग्लिस प्रतिद्वन्द्वीलाई पाखा लगाउँदै समूहको शीर्षस्थानमा उक्लने दाउमा हुनेछ । एटलान्टा ४ अंक जोडेर शीर्षस्थानमा रहेको छ । लिभरपुल ६ अंकसहित शीर्षस्थानमा रहेको छ ।

समूह चरणको पहिलो खेलमा डेनिस प्रतिद्वन्द्वी मिड्टजेल्यान्डमाथि ४–० को जित निकालेको एटलान्टा दोस्रो खेलमा आयाक्ससँग २–२ गोलको बराबरीमा रोकिएको थियो । एटलान्टा लिभरपुललाई हराउदै जितको लय समात्ने दाउमा हुनेछ । एटलान्टासँग डुभान जापटा, जोसेस इलिसिस, एलजान्द्रो गोमेज, हान्स हाटेनबोइर, राफायल टोलोई, मारियो पासालिस, क्रिस्टियन रोमेरो र गोलरक्षक मार्काे स्पोर्टाेलो जस्ता खेलाडीको साथ रहेको छ ।

यता, लिभरपुल पनि घरेलु टोलीलाई पराजित गर्दै शतप्रतिशत जितको लक्ष्यमा मैदानमा उत्रनेछ । लिभरपुलले पनि समूहको पहिलो खेलमा आयाक्सलाई १–० ले तथा मिड्टजेल्यान्डलाई २–० ले हराएको थियो ।

लिभरपुलका लागि मोहम्मद सलाह नै मुख्य हतियार हुनेछन् । उनलाई साडियो माने, रोबर्टाे फिर्मिन्हो, डिएगो जोटा, जर्जिन्हो वाइनाल्डम, जोर्डन हेन्डरसन, एन्ड्रिउ रोबर्टसन, जोसेप गोमेज, ट्रेन्ट एलेक्सान्डर अर्नाेल्ड र गोलरक्षक एलिसन बेकरले साथ दिनेछन् । चोटका कारण भर्जिल भान डाइक टोलीमा हुनेछैनन् ।

यही समूह ‘डी’ को अर्काे खेलमा मिड्टजेल्यान्ड र आयाक्सबीच राति १ः४५ बजे नै प्रतिस्पर्धा हुनेछ ।