एजेन्सी – नेपाली राष्ट्रिय फुटबल टोलीका थप दुई खेलाडीमा कोरोना संक्रमण देखिएको छ । बंगलादेशविरुद्ध दुई मैत्रीपूर्ण खेलका लागि प्रशिक्षण गरिरहेको टोलीमा यसअघि ५ खेलाडीलाई संक्रमण देखिएको थियो ।

दशरथ रंगशालामा पछिल्लो एक सातायता प्रशिक्षणरत टोलीमा कुल ७ खेलाडीमा संक्रमण देखिएसँगै अब खेल हुने नहुनेमा पनि आशंका बढेको छ । ३४ खेलाडी सम्मिलित प्रारम्भिक टोलीमा ७ खेलाडी कोरोना संक्रमण लागेपछि अब अन्य खेलाडीमा पनि सर्ने डर बढेको छ ।

पहिलो दिनको प्रशिक्षणअघि नै ४ खेलाडी आइसोलेसनमा बसेका थिए । पहिलो दिन प्रशिक्षणपछि थप एक खेलाडीमा संक्रमण पुष्टि भएको थियो । त्यस्तै मंगलबार दिउँसो गरिएको परिक्षणमा थप दुई खेलाडीमा संक्रमण देखिएको छ । टोली केहि दिनमा नै बंगलादेश प्रस्थान गर्ने भनेपनि अब संक्रमण बढेसँगै त्यसमा परिवर्तन आउने सम्भावना रहेको छ ।

टोलीको प्रस्थानका लागि मंगलबार गरिएको स्वाब परिक्षणमा बंगलादेश प्रस्थान गर्ने तयारीमा रहेको दुई संचारकर्मीलाई पनि संक्रमण देखिएको एन्फाले जनाएको छ । मैत्रीपूर्ण खेलका लागि प्रस्थान गर्ने सबै खेलाडी र अफिसियलको परिक्षण गरिएको थियो ।

मुख्य प्रशिक्षक योहान कालिनको अनुपस्थितिमा बालगोपाल महर्जनले टोलीको प्रशिक्षण सम्हालिरहेका छन् । उनले सहायक प्रशिक्षक किरण श्रेष्ठ र गोलरक्षक प्रशिक्षक विकास मल्लसँग टोलीको प्रशिक्षण हेरिरहेका छन् । नेपालले नोभेम्बर १३ र १७ तारिखमा ढाकास्थित बंगबंधु रंगशालामा खेल्ने कार्यक्रम रहेको छ ।