एजेन्सी – पोर्चुगिज फरवार्ड डिएगो जोटाको ह्याट्रिक सहयोगमा इंग्लिस क्लब लिभरपुलले इटालियन क्लब एटलान्टालाई उसकै मैदानमा ५–० को सानदार जित हात निकालेको छ ।

अर्काे दुई गोल मोहम्मद सलाह र साडियो मानेको नाममा रह्यो । लिभरपुलले खेलको ५४ मिनेटभित्रै ५ गोल गर्न सफल भएको थियो । गेविस स्टेडियम बरगामोमा मंगलबार राति भएको एकपक्षीय खेलमा लिभरपुलले खेलको १६औं मिनेटमा डिएगो जोटाको गोलबाट अग्रता लिन सफल भएको थियो । उनले ट्रेन्ट एलेक्सान्डर अर्नाेल्डको पासमा गोल गर्न सफल भएका थिए ।

३३औं मिनेटमा जोटाले जोसेप गोमेजको पासमा गोल गर्दै लिभरपुललाई पहिलो हाफमा २–० को अग्रता दिलाए । ४७औं मिनेटमा मोहम्मद सलाहले कर्टिस जोन्सको पासमा गोल गरेपछि लिभरपुल ३–० ले अघि बढ्यो । त्यसको दुई मिनेट पछि नै सलाहको पासमा साडियो मानेले गोल गर्दै लिभरपुललाई ४–० ले अघ बढाए ।

५४औं मिनेटमा साडियो मानेको पासमा जोटाले ह्याट्रिक पुरा गरेपछि लिभरपुलले ५–० को जित दर्ता गर्न सफल भयो । यसै समयरमा लिभरपुल आएपछि जोटाको यो पहिलो ह्याट्रिक हो । घरेलु टोली एटलान्टाले लिभरपुलको पोस्टमा केही आक्रमण बुनेपनि गोलरक्षक एलिसन बेकर बाधक बने ।

६३औं मिनेटमा डुभान जापटाको प्रहार पोस्टमा लागेर फर्कदा एटलान्टा अग्रता कम गर्नबाट चुक्यो । ६८औं मिनेटमा जापटाकै प्रहारमा गोलरक्षक एलिसन बेकर बाधक बने । ७२औं मिनेटमा रोबर्टाे फिर्मिनोको प्रहारलाई पेनाल्टी बक्समा डिफेन्डरले ब्लक गरिदिए ।

८२औं मिनेटमा मालिनोभ्स्कीको पासमा जापटाको अर्काे प्रहारलाई गोलरक्षक एलिसनले सहजै नियन्त्रणमा लिदै एटलान्टालाई निराश पारे । ८९औं मिनेटमा मालिनोभ्स्कीको कर्नरलाई रुगेरीलाई सदुपयोग गर्न नसक्दा घरेलु मैदानमा फराकिलो हार बेहोर्ना बाध्य बन्यो ।

यो जितसँगै समुहमा अपराजित रहेको लिभरपुल ९ अंक जोडेर शीर्षस्थानमा रहेको छ । समान ४ अंक भएपनि आयाक्स दोस्रो तथा र एटलान्टा तेस्रो स्थानमा रहेको छ । मिड्टजेल्यान्डको अंकको खाता खोल्न सकेको छैन ।

यही समूह ‘डी’ को अर्काे खेलमा डच क्लब आयाक्सले डेनिस क्लब मिड्टजेल्यान्डमाथि २–१ को जित निकालेको छ । आयाक्सको जितमा एन्टोनी र डुसान टाडिकले गोल गरे । घरेलु टोलीका एन्ड्रेस ड्रेयरले एक गोल फर्काए ।