एजेन्सी – चोटपछि पूनरागमन गरेको खेलमै ब्राजिली फरवार्ड गाब्रियल जेससले गोल गरेपछि इंग्लिस क्लब म्यानचेस्टर सिटीले युइएएफए च्याम्पियन्स लिगको समूह चरणमा लगतार तेस्रो जित निकालेको छ ।

घरेलु मैदान इतिहाद स्टेडियममा मंगलबार राति भएको खेलमा सिटीले ओलम्पियाकोसमाथि ३–० को सहज जित हात पारेको हो । बाँकी गोल फेरान टोरेस र जोआओ क्यान्सिलोको नाममा रह्यो ।

खेलको १२औं मिनेटमा नै केभिन डि ब्रुयनको पासमा फेरान टोरेसले गोल गर्दै सिटीलाई अघि बढाएका थिए । खेलको सुरुमै अग्रता लिएपछि सिटीले दोस्रो गोलको लागि दोस्रो हाफको अन्त्यतिरको समय नै कुर्नु परेको थियो ।

२७औं मिनेटमा रहिम स्ट्रलिङको प्रहार ओलम्पियाकोसका गोलरक्षक जोश साले बचाए । ५४औं मिनेटमा ओलम्पियाकोसले बराबरीको अवसर पाएपनि सदुपयोग गर्न सकेन । ८१औं मिनेटमा सब्सिच्युट जेससले केभिन डि ब्रुयनकै पासमा गोल गर्दै सिटीको अग्रता दोब्बर पारे ।

उनी ६९औं मिनेटमा रियाद महारेजको स्थानमा मैदान छिरेका थिए । चोटका कारण उनी एक महिना मैदान बाहिर रहेका थिए । तर, पुनरागमनमै गोल गरेपछि सिटीले आइतबार लिभरपुलविरुद्धको खेलको लागि तयार रहेको संकेत दिएको छ ।

९०औं मिनेटमा फेलिक्स मेचाको पासमा जोआओ क्यान्सिलोले गोल गर्दै सिटीलाई ३–० को सहज जित दिलाए । जितसँगै सिटीको समूह ‘सी’ मा तीन खेलबाट ९ अंक पुगेको छ । पराजित ओलम्पियाकोस ३ अंकसपहित तेस्रो स्थानमा रहेको छ ।

यही समुहको अर्काे खेलमा पोर्चुगिज क्लब एफसी पोर्टाेले फ्रान्सेली क्लब मार्सेमाथि ३–० कै जित हात पारेको छ । पोर्टाेको जितममा मोउसा मरेगा, सर्जियो ओलिभेरा र लुइस डियाजले गोल गरे ।

मार्सेका डिमिट्री पायन पेनाल्टीमा चुकेको थियो । यो नतिजासँगै पोर्टाे ६ अंक जोडेर दोस्रो स्थानमा उक्लदा मार्से अंकविहीन हुदै पुछारमा छ ।

च्याम्पियन्स लिग नतिजा

समूह ‘ए’ – लोकोमोटिभ मस्कोविरुद्ध एट्लेटिको म्याड्रिड (१–१), साल्जवर्गविरुद्ध बायर्न म्युनिख (२–६)

समूह ‘बी’ – साख्तर डोनेस्कविरुद्ध बोरुसिया मोन्चेनग्लाडवाक (०–६), रियल म्याड्रिडविरुद्ध इन्टर मिलान (३–२)

समूह ‘सी’ – पोर्टाेविरुद्ध मार्से (३–०), म्यानचेस्टर सिटीविरुद्ध ओलम्पियाकोस (३–०)

समूह ‘डी’ – एटलान्टाविरुद्ध लिभरपुल (०–५), मिड्टजेल्यान्डविरुद्ध आयाक्स (१–२)