एजेन्सी – इटालियन च्याम्पियन युभेन्टसले यूईएफए च्याम्पियन्स लिग अन्तर्गत बुधबार हंगेरीको फेरेन्कभारोसलाई ४-१ को फराकिलो अन्तरले पराजित गरेको छ । युभेन्टसको जितमा अल्भारो मोराटाले दुई तथा पाउलो डिबालाले १ गोल गरे । अर्को गोल आत्मघाती गोल रहयो ।

खेलको सातौं मिनेटमा नै पाहुना टोली युभेन्टसले मोराटाको गोलमा अग्रता लियो । जुआन क्वाडराडोले पेनाल्टी क्षेत्र भित्रबाट दिएको लो क्रसमा रोनाल्डो र विपक्षी गोलरक्षक समेत बिट भएपछि फार पोस्टमा रहेका मोराटाले सहजै गोल गरेका थिए । ४३ औं मिनेटमा आरोन रामजीको पासमा रोनाल्डोको प्रहार विपक्षी डिफेन्डरले ब्लक गरिदिए ।

खेलको ६० औं मिनेटमा मोराटाले दोस्रो गोल गर्दै युभेन्टसको अग्रता दोब्बर पारे । रोनाल्डोले बायाँ विंगबाट दिएको पासलाई उनले पहिलो टचमा नै गोलमा परिणत गरेका थिए । अग्रता दोब्बर पार्नुभन्दा २ मिनेट अघि रोनाल्डोको प्रहार पोस्टभन्दा थोरै परबाट बाहिरिएको थियो ।

मोराटाको स्थानमा मैदान प्रवेश गरेका पाउलो डिबालाले ७१ औं मिनेटमा गरेको चिप प्रहारले पोस्टको दिशा लिन सकेन । ७२ औं मिनेटमा अन्तत: डिबालाले गोलको खाता खोले । आफ्नै डिफेन्डरले दिएको पासलाई गोलरक्षक डेनेस दिबुस्जले पेनाल्टी क्षेत्रभित्र नियन्त्रणमा लिन नसक्दा डिबालाले खालि पोस्टमा गोल गर्न पुगेका थिए ।

८२ औं मिनेटमा गोलरक्षक दिबुस्जले अर्को गल्ति गर्दा डिबालाले अर्को गोल थप्ने अवसर पाए । दिबुस्जले क्लियर गर्न खोजेको बललाई डिबालाले नियन्त्रणमा लिंदै प्रहार गरेपछि लासा दिभालीले गोललाइनमा बचाउन खोजेपनि सफल हुन सकेनन् । अन्तिम मिनेटमा फ्रान्क बोलीले घरेलु टोलीका लागि सान्त्वना गोल गरेका थिए ।

यस जितसँगै युभेन्टसले समूह चरणमा दोस्रो जित दर्ता गरेको छ । पहिलो खेलमा डिनामो किएभलाई पराजित गरेको युभेन्टस दोस्रो खेलमा बार्सिलोनासँग पराजित भएको थियो । शीर्षस्थानको बार्सिलोनाको ३ खेलमा ९ अंक छ भने दोस्रो स्थानको युभेन्टसको ६ अंक छ । डिनामो किएभ र फेरेन्कभारोसको १-१ अंक छ ।

यो पनि : बार्सिलोनाको लगातार तेस्रो जित