एजेन्सी – युवा फरवार्ड एर्लिङ ब्राउट हालान्ड र थोर्गन हाजार्ड चम्किएपछि जर्मन क्लब बोरुसिया डर्टमुन्डले युइएफए च्याम्पियन्स लिगमा दोस्रो जित निकालेको छ ।

डर्टमुन्डले बेल्जियन क्लब ब्रगलाई उसकै मैदानमा ३–० ले पराजित गरेको हो । डर्टमुन्डको जितमा नर्वेजियन फरवार्ड हालान्डले दुई तथा बेल्जियन मिडफिल्डर थोर्गन हाजार्डले एक गोल गरे । सबै तीन गोल पहिलो हाफमा सम्भव भएको थियो ।

पहिलो खेलमा इटालियन प्रतिद्धन्द्धी लाजियोसँग ३–१ ले पराजित भएको डर्टमुन्डले दोस्रो खेलमा रसियन क्लब जेनिथमाथि २–० को जित निकालेको थियो । ब्रगमा बुधबार राति भएको खेलमा पाहुना टोली डर्टमुन्डले १४औं मिनेटमा थोर्गन हाजार्डको गोलबाट अग्रता लिएको थियो ।

१८औं मिनेटमा एर्लिङ ब्राउट हालान्डले डर्टमुन्डको अग्रता दोब्बर पारे । ३२औं मिनेटमा आलान्डले व्यक्तिगत दोस्रो गोल गर्दै टोलीलाई ३–० ले अघि बढाए । ३७औं मिनेटमा इडुआर्ड सोवोलले अवसर पाएपनि सदुपयोग गर्न नसक्दा घरेलु टोली अग्रता घटाउनबाट चुक्यो ।

५७औं मिनेटमा नोआ ल्याङको पासमा इमान्युयल डेनिस चुक्दा क्लब ब्रगले पुन अग्रता घटाउने अवसर गुमायो । त्यसपछि थप गोल निस्कन नसक्दा डर्टमुन्ड ३–० ले विजयी हुने सफल भयो ।

लगातार दोस्रो जितसँगै डर्टमुन्ड समूह ‘एफ’ मा ३ खेलबाट ६ अंक जोडेर शीर्षस्थानमा उक्लिएको छ । लाजियो जेनिथसँग १–१ गोलको बराबरीमा रोकिएको फाइदा डर्टमुन्डले उठायो ।

लाजियो ५ अंकसहित दोस्रो स्थानमा छ । क्लब ब्रग ४ अंकसहित तेस्रो स्थानमा रहँदा जेनिथ १ अंक जोडेर पुछारमा छ ।