एजेन्सी – जर्मन फरवार्ड टिमो वेर्नरको दुुई गोल सहयोगमा इंग्लिस क्लब चेल्सीले युइएफए च्याम्पियन्स लिगमा फ्रान्सेली प्रतिद्धन्द्धी रेनेसलाई ३–० ले हराएको छ ।

घरेलु मैदान स्टामफोर्ड ब्रिजमा बुधबार राति भएको खेलमा चेल्सीको सहज जितमा अर्काे एक गोल इंग्लिस फरवार्ड ट्याम्मी अब्राहमले गरे । खेलको १०औं मिनेटमा टिमो वेर्नरले पेनाल्टी मार्फत चेल्सीलाई अग्रता दिलाएका थिए । पेनाल्टी बक्समा डाल्बर्टले वेर्नरलाई लडाएपछि प्राप्त पेनाल्टीमा वेर्नर आफैले गोल गरेका थिए ।

४०औं मिनेटमा रेनेस १० खेलाडीमा समेटियो । यसपटक ट्याम्मी अब्राहमको प्रहारलाई डाल्बर्टले हातले रोकेपछि रेफ्रीले उनलाई दोहोरो पहेँलो कार्ड देखाउदै मैदान बाहिर पठाउदै चेल्सीलाई पेनाल्टी प्रदान गरेको थियो । जसमा वेर्नर ४१औं मिनेटमा वेर्नरले नै पेनाल्टीमार्फत दोस्रो गोल गर्दै चेल्सीको अग्रता दोब्बर पारे ।

५०औं मिनेटमा अब्राहमले गोल गर्दै चेल्सीलाई ३–० ले अघि बढाए । उनले रिस जेम्सको पासमा गोल गरेका थिए । ६७औं मिनेटमा वेर्नर ह्याट्रिकबाट चुके । ७४औं मिनेटमा ओलिभर जिरुड चुके । रेनेसले कुनै पनि समय चेल्सीको पोस्टमा गतिलो आक्रमण बुन्न नसक्दा ३–० ले पराजित हुन पुग्यो ।

यो जितसँगै समूह ‘ई’ मा चेल्सी तीन खेलबाट ७ अंक जोडेर शीर्षस्थानमा उक्लिएको छ । समान ७ अंक नै रहेपनि स्पेनिस क्लब सेभिया गोलअन्तरमा दोस्रो स्थानमा छ । रसियन क्लब क्रास्नाडोर र रेनेसको समान १ अंक छ ।

बुधबार राति नै भएको खेलमा १० खेलाडीमा समेटिएको सेभियाले क्रास्नाडोरमाथि ३–२ को पूनरागमन जित निकालेको छ । सेभियाको पूनरागमन जितमा युसेफ इन न्यास्रीले दुई तथा इभान राकिटिचले एक गोल गरे । मागोमेड सापी सुलेमानोभ र मार्कुस वर्गको गाल सान्त्वना बन्यो ।

पहिलो हाफको इन्ज्युरी समयमा जेसस नाभास सिधै रातो कार्ड खादै मैदानबाट बाहिरिएपछि सेभियाले दोस्रो हाफमा १० खेलाडीमा रहेर खेलेको थियो । सेभियाले दोस्रो हाफमै दुई गोल गर्दै जित निकाल्न सफल भयो ।