एजेन्सी – क्याटलान क्लब बार्सिलोनाका कप्तान लिओनेल मेस्सी स्पेनिस ला लिगा अन्तर्गत आइतबार रियल बेटिसविरुद्ध खेलमा बेन्चमा रहेका छन् ।

पछिल्लो समय निरन्तर पूरा समय मैदान बिताएका मेस्सीलाई प्रशिक्षक रोनाल्ड कोम्यानले यस सिजन पहिलो पटक विश्राम दिएका हुन् । च्याम्पियन्स लिग र ला लिगामा नियमित खेलसँगै विश्वकप छनोटका लागि अर्जेन्टिनाबाट समेत खेलिरहेका कारण कोम्यानले यो निर्णय लिएका हुन् ।

मेस्सीले यस सिजन अपेक्षित प्रदर्शन गर्न सकेका छैनन् । उनले गरेका सबै गोल पेनाल्टीमा आएका छन् र टोलीको आक्रमणमा पनि उनले खासै प्रभाव जमाउन सकेका छैनन् । प्रशिक्षक कोम्यानले बार्सिलोना आएयता पहिलोपटक मेस्सीबिना टोली उतार्न लागेका हुन् । उनले एन्टोइन ग्रिजमन, अन्सु फाती, पेड्री र ओस्मान डेम्बेलेलाई आक्रमणको जिम्मेवारी सुम्पिएका छन् ।

मिडफिल्डमा फ्रेन्की डे जोङ र सर्जियो बुस्केट्सले आक्रमण र डिफेन्ससँग समन्वय गर्नेछन् । डिफेन्समा जेरार्ड पिके र क्लेमेन्ट लेङलेटसँग जोर्डी अल्बा र सर्जी रोबर्टोले खेल्नेछन् । गोलरक्षकको जिम्मेवारी मार्क आन्दर टेर स्टेगनले निभाउनेछन् ।

बार्सिलोनाको सुरुवाती रोजाई : एन्टोइन ग्रिजमन, अन्सु फाती, पेड्री, ओस्मान डेम्बेले, फ्रेन्की डे जोङ, सर्जियो बुस्केट्स, जेरार्ड पिके, क्लेमेन्ट लेङलेट, जोर्डी अल्बा, सर्जी रोबर्टो, मार्क आन्दर टेर स्टेगन

रियल बेटिसको सुरुवाती रोजाई : ब्राभो, एमर्सन, मान्डी, बार्टरा, एलेक्स मोरेनो, विलियम, गिडो. जोआकिन, कानालेस, टेलो, सनाब्रिया