एजेन्सी – युरोपेली च्याम्पियन बायर्न म्युनिखले जर्मन बुन्डेसलिगा अन्तर्गत शनिबार भएको खेलमा निकटतम प्रतिद्वन्द्वी बोरुसिया डर्टमुन्डलाई ३-२ ले पराजित गरेको छ ।

खेलमा घरेलु टोली डर्टमुन्डले सुरुवाती अग्रता लिएपनि त्यसलाई जोगाउन नसक्दा हार बेहोर्नुपर्यो । कप्तान मारको रिउसले पहिलो हाफको ४५ औं मिनेटमा गोल गर्दै बायर्नविरुद्ध अग्रता दिलाएका थिए । उनले राफैल गुरेरोको क्रसलाई पहिलो टचमा नै गोल गरेका थिए । तर उक्त अग्रता पहिलो हाफसम्म पनि टिकेन ।

इन्ज्युरी समयको चौथो मिनेटमा डेविड अलावाले फ्रिकिकमा चलाखीपूर्ण मुभ बनाउँदै खेल बराबरीमा ल्याए । पहिलो हाफमा नै रोबर्ट लेवान्डोस्कीले गोल गर्दै अग्रता दिलाएपनि भीएआरले उक्त गोललाई मान्यता दिएको थिएन ।

दोस्रो हाफको ४८ औं मिनेटमा लेवान्डोसकीले गोल गर्न सफल भए । उनले लुकास हर्नान्डेजको क्रसलाई हेडरमार्फत गोल गर्दै बायर्नलाई अग्रता दिलाए । ८० औं मिनेटमा लेवान्डोस्कीकै पासमा लेरोय सानेले गोल गर्दै अग्रता दोब्बर पारे । ८३ औं मिनेटमा एर्लीङ हालान्डले डर्टमुन्डका लागि गोल फर्काएपनि नतिजा बदल्न भने उक्त गोल पर्याप्त रहेन ।

यस नतिजासँगै बायर्नले लिग तालिकाको शीर्ष स्थानमा पकड बलियो बनाएको छ । बायर्नको ७ खेलमा १८ अंक छ भने दोस्रो स्थानको लाइप्जिगको १६ र डर्टमुन्डको १५ अंक रहेको छ ।