एजेन्सी – इटालियन सिरी ‘ए’ मा आज राति गत सिजन लिग उपाधिका लागि प्रतिस्पर्धा गरेका युभेन्ट्स र लाजियोबीच खेल हुँदैछ । खेल लाजियोको मैदानमा नेपाली समयानुसार साँझ ५ः१५ बजे सुरु हुनेछ ।

घरेलु टोली लाजियोलाई हराउदै युभेन्ट्स अंक तालिका सुधार गर्ने लक्ष्यमा हुनेछ । ६ खेलबाट १२ अंक जोडेको युभेन्ट्स १२ अंक जोडेर तेस्रो स्थानमा रहेको छ । यता, लाजियो पनि युभेन्ट्सलाई हराउदै अंक तालिका सुधार गर्ने योजनामा रहनेछ । युभेन्ट्सविरुद्ध लाजियोको लक्ष्य अंक खोस्ने नै हुनेछ । लाजियो १० अंक जोडेर नवौं स्थानमा रहेको छ ।

क्रिस्टियानो रोनाल्डासँगै पछिल्ला खेलमा लगातार गोल गरिरहेका स्पेनिस फरवार्ड अल्भारो मोराटाले लाजियोविरुद्ध अग्रपङ्ति सम्हाल्नेछन् । पाउलो डिबाला भने अझैपनि पूर्ण फिट हुन् संघर्षरत छन् । आर्थर, आरान राम्से, एड्रियन राविओट, जुवान कोर्डाडो, लियोनाद्रो बोनुची, डानिलो, फेडरिको किएजा पनि टोलीसँग रहेका छन् । भेट्रान डिफेन्डर जिओर्जियो किएलिनी चोटबाट फर्केपनि यस खेलका लागि उपलब्ध छैनन् ।

लाजियोका लागि फरवार्ड चिरो इम्मोबिले, मिडफिल्डर लुकास लेइभा र गोलरक्षक थोमस स्ट्राकोसा टोलीमा रहने छैनन् । कोरोना संक्रमणका कारण च्याम्पियन्स लिगका खेल गुमाएका उनीहरुको कोरोना परिक्षणलाई लिएर विवाद भएपछि पुन: परिक्षण गरिएको थियो । शुक्रबारको रिपोर्ट नेगेटिभ आएपनि उनीहरु टोलीमा नरहने बुझिएको छ ।

अन्य खेल :

एटलान्टाविरुद्ध इन्टर मिलान (राति ७ः४५ बजे)

जिनोआविरुद्ध रोमा (राति ७ः४५ बजे)

बोलोग्नाविरुद्ध नेपोली (राति १०ः४५ बजे)

मिलानविरुद्ध हेलास भेरोना (राति १ः३० बजे)