एजेन्सी – अन्तिम एक मिनेट सम्हालिन नसक्दा युभेन्ट्स लाजियोसँग बराबरीमा रोकिएको छ । घरेलु मैदानमा लाजियोले युभेन्ट्सलाई १–१ गोलको बराबरीमा रोक्दै अंक खोस्न सफल भएको हो ।

स्टेडियो ओलम्पिको रोमामा आइतबार साँझ भएको निकै नै प्रतिस्पर्धात्मक खेलमा रोनाल्डोको खेलको १५औं मिनेटमा अग्रता दिलाएका थिए । तर, इन्ज्युरी समयको थप गरिएको पाँचौ मिनेटमा फिलिपे काइसेडोले गोल गर्दै लाजियोलाई हारबाट जोगए ।

जुवान क्वाडराडोले निकै नै मिहनेतपुर्वक गरेको क्रसलाई रोनाल्डोले १५औं मिनेटमा सहजै गोल गर्न सफल भएका थिए । ३७औं मिनेटमा रोनाल्डोको झन्डै २५ यार्ड टाढाको प्रहार पोस्टबाट थोरै बाहिरिदा युभेन्ट्स अग्रता दोब्बर पार्नबाट चुक्यो । ४२औं मिनेटमा रोनाल्डो नै चुके । पहिलो हाफको इन्ज्युरी समयमा रोनाल्डाको प्रहारमा गोलरक्षक पेपे रेइना बाधक बने । रोनाल्डोको प्रहार पोस्टमा लागेर फर्कंदा युभेन्टस अग्रता दोब्बर पार्नबाट चुकेको थियो ।

४९औं मिनेटमा एडाम मारुसिकले बराबरीको अवसर खेर फाले । दोस्रो हाफको मध्यतिर रोनाल्डो चोट लागेपछि मैदान छाडेका थिए । उनको स्थानमा आएका फरवार्ड पाउलो डिबलाले केहि अवसर पाएपनि त्यसलाई सदुपयोग गर्न सकेनन् ।

८२औं मिनेटमा मारुसिकको प्रहारमा गोलरक्षक वजसिएच बाधक बन्दा घरेलु टोली पुनः बराबरीबाट चुक्यो । इन्ज्युरी समयको थप गरिएको पाँचौ मिनेटमा फिलिपे काइसेडोले जोआक्विन कोरेयाको पासमा गोल गर्दै खेललाई १–१ गोलको बराबरीमा सकाए ।

यो बराबरीसँगै युभेन्ट्सले दोस्रो स्थानमा उक्लने मौका गुमाएको छ । युभेन्ट्स ७ खेलबाट १३ अंक जोडेर तेस्रो स्थानमा यथावत रहेको छ । लाजियो ११ अंक जोडेर नवौं स्थानमा उक्लिएको छ । शीर्षस्थानमा रहेको एसी मिलानको १६ अंक छ ।