एजेन्सी – इंग्लिस प्रिमियर लिगमा आर्सनल घरेलु मैदानमा एस्टन भिल्लासँग पराजित भएको छ । एस्टन भिल्लाले आर्सनललाई ३–० ले हराएको हो ।

इमिरेट्स स्टेडियममा भिल्लाको जितमा ओली वाट्किन्सले दुई गोल गर्दा एक गोल उपहार पाएको थियो । आइतबार राति भएको खेलको पहिलो मिनेटमा नै जोन म्याक्जिनले गोल गरेपनि भिएआरबाट मान्यता नपाउदा एस्टन भिल्ला अग्रता लिनबाट चुकेको थियो ।

२५औं मिनेटमा बुकायो साकाको आत्मघाती गोलबाट एस्टन भिल्लाले अग्रता बनायो । ज्याक ग्रेयलिस, रस बार्कले र ट्रयाजिग्वेटको समन्वयमा बनेको मुभमा ट्रयाजिग्वेटले गरेको क्रसलाई बचाउन खोज्दा साकाले आफ्नै पोस्टमा गोल गर्न पुगेका थिए । ४१औं मिनेटमा एलेक्सान्द्र लाकाजेटको क्लोज रेन्जबाट गरेको हेडर पोस्टबाट थोरै बाहिरिदा आर्सनल बराबरीबाट चुक्यो ।

४८औं मिनेटमा ट्रयाजिग्वेटको प्रहारलाई आर्सनलका गोलरक्षक बन्ड लेनोले बचाए । त्यसपछि वाट्किन्सले चार मिनेटको अन्तरमा दुई गोल गरेपछि आर्सनलको हार सुनिश्चित भएको थियो ।

वाट्किन्सले ७२औं मिनेटमा रस बार्कलेको पासमा गोल गर्दै एस्टन भिल्लाको अग्रता दोब्बर पारे । ७५औं मिनेटमा ज्याक ग्रेयलिसको पासमा वाट्किन्सले व्यक्तिगत दोस्रो गोल गर्दै भिल्लाको जित सुनिश्चित गरे ।

यो जितसँगै एस्टन भिल्ला ७ खेलबाट १५ अंक जोडेर छैटौ स्थानमा उक्लिएको छ । पराजित आर्सनल १२ अंकसहित ११औं स्थानमा छ ।