एजेन्सी – इन्ज्युरी समयमा भेट्रान फरवार्ड ज्लाटन इब्राहिमोभिचले गोल गरेपछि शीर्षस्थानमा रहेको एसी मिलान इटालियन सिरी ‘ए’ मा हेलास भेरोनासँगको हारबाट जोगिएको छ ।

२–० ले पछि परेको स्थितिमा मिलानले भेरोनासँग २–२ गोलको बराबरी खेलेको हो । मिलानो इटालीमा आइतबार राति भएको खेलमा घरेलु टोली मिलान खेलको छैटौ मिनेटमा एन्टोनिन बाराकको गोलमा पछि परेको थियो ।

१९औं मिनेटमा डाभिड कालाब्रियाले आत्मघाती गोल गरेपछि मिलान खेलमा २–० ले पछि परेको थियो । माटिया जाकाग्नीको प्रहार कालाब्रियालाई डिफ्लेक्ट हुदै गोलमा परिणत हुदा डोन्नररुम्माले रोक्ने कुनै अवसर नै पाएन ।

२७औं मिनेटमा जियानजियाकोमो माग्नानीले आत्मघाती गोल गरेपछि मिलान खेलमा फर्किएको थियो । फ्रान्क केइसीको प्रहार माग्नानीलाई डिफ्लेक्ट हुदै गोलमा परिणत भएको थियो । ५१औं मिनेटमा हकान कलहानोग्लुले गोल गरेपनि अफसाइड पोजिसनमा रहेकाले उनको गोलले मान्यता नपाउदा मिलान बराबरीबाट चुक्यो ।

६३औं मिनेटमा थियो हर्नान्डेजको प्रहारलाई भेरोनाका गोलरक्षक मार्काे सिल्भेट्रीले उत्कृष्ट बचाउ गरे । ६५औं मिनेटमा ज्लाटन इब्राहिमोभिचले पेनाल्टी चुकाउदा मिलान पनि बराबरीबाट चुक्यो । ७६औं मिनेटमा ज्लाटनकै प्रहार क्रसबारमा लागेर बाहिरिदा मिलान पुनः बराबरीबाट चुक्यो । लगत्तै ७७औं मिनेटमा इब्राहिमोभिचले दुई डिफेन्डरलाई बिट गर्दै गरेको प्रहार पोस्ट नजिकैबाट बाहिरियो ।

इन्ज्युरी समयको थप गरिएको तेस्रो मिनेटमा ज्लाटनले गोल गर्दै मिलानलाई हारबाट जोगाए । उनले ब्राहिम डियाजको पासमा गोल गर्न सफल भएका थिए ।

बराबरीसँगै अपराजित रहेको मिलान ७ खेलबाट १७ अंक जोडेर शीर्षस्थानमा यथावत रहेको छ । दोस्रो स्थानको सस्सुलोको १५ अंक रहेको छ । भेरोना १२ अंकसहित आठौं स्थानमा छ ।

अन्य नतिजा
एटलान्टाविरुद्ध इन्टर (१–१), जिनोआविरुद्ध रोमा (१–३), टोरिनोविरुद्ध क्रोटोन (०–०), बोलोग्नाविरुद्ध नेपोली (०–१)