एजेन्सी – इटालियन क्लब युभेन्ट्सले आफ्ना पोर्चुगिज स्टार फरवार्ड क्रिस्टियानो रोनाल्डोलाई बेच्ने मनसाय बनाएको छ । युभेन्ट्सले रोनाल्डोलाई सिजनको अन्त्यसँगै बेच्ने तयारी गरेको हो ।

३५ वर्षीय रोनाल्डो सन् २०१८ मा स्पेनिस क्लब रियल म्याड्रिडबाट युभेन्ट्स पुगेका थिए । रोनाल्डो र युभेन्ट्सबीच २०२२ सम्मको सम्झौता रहेको छ । तर, युभेन्ट्सले सम्झौता समय बाँकी छदै पाँच पटकको बालोन डिओर च्याम्पियन रोनाल्डोलाई बेच्ने तयारी गरेको हो ।

युभेन्टेसले रोनाल्डोको बढ्दो उमेरलाई ध्यानमा राख्दै उनलाई कम मुल्यमा बेच्ने योजना बनाएको हो । सम्झौता सकिएपछि फ्रि एजेन्टमार्फत क्लब छाड्ने भएकले युभेन्ट्स त्यसअघि नै रोनाल्डोलाई बेच्दै केही रकम लिने मनसायमा रहेको छ ।

युभेन्ट्समा तेस्रो सिजन बिताइरहेका रोनाल्डोले युभेन्टस्सबाट हालसम्म ९४ खेल खेल्दै ७१ गोल गरेका छन् । उनले त्यहाँ दुई सिरी ‘ए’ र एक कोपा इटालियन जितेका छन् । रोनाल्डोले यो सिजन ५ खेलमा ६ गोल गरिसकेका छन् ।

इटालियन संचारमाध्यमका अनुसार युभेन्टसले रोनाल्डोबाट लामो समय अहिलेको स्तरको प्रदर्शन अपेक्षा गर्न नसकिने बुझेको छ । रोनाल्डो आफैं पनि यस विषयमा जानकार छन् र दुवै पक्षले एजेन्टसँग मिलेर उचित निर्णय लिने तयारी छ । लगातार उच्च लयमा खेलिरहेपनि युभेन्टसले भविष्यलाई हेर्दै यो निर्णय लिन बाध्य भएको बुझिएको छ ।