नेपाल विरुद्ध बंगलादेश

खेल सुरु हुने समय : साँझ ४:४५ बजे

स्थान : बंगबन्धु रंगशाला

प्रत्यक्ष प्रसारण : टि-स्पोर्ट्स बंगलादेश (हाम्रो खेलकुदमा खेल सुरु हुनुअघि लिंक उपलब्ध हुनेछ)

खेलअघि के भन्छन् कप्तान र प्रशिक्षक ?

घरेलु टोलीविरुद्ध मैदान उत्रँदा नेपाली टोली जितको लक्ष्यमा हुनेछ । खेल अघिको प्रि–म्याच पत्रकार सम्मेलनमा नेपाली टोलीका प्रशिक्षक बालगोपल महर्जनले टोलीको प्रशिक्षण राम्रो भएकाले घरेलु टोलीविरुद्ध राम्रो नतिजाका लागि खेल्ने बताएका छन् ।

‘मैत्रीपुर्ण खेलका लागि हामी (नेपाल) लाई निमन्त्रणा गरेकोमा बंगलादेश फुटबल फेडेरेसनलाई धेरै धेरै धन्यवाद । तर, मैत्रीपुर्ण खेलका लागि हामीले थोरै समय पायौ । तर, खेल्न पाउनु नै ठुलो कुरा हो,’ खेल अघिको पत्रकार सम्मेलनमा प्रशिक्षक महर्जनले भने ।

‘टिमको प्रशिक्षण राम्रो रहेको छ । विश्वकप छनोटको लागि यो खेल तयारी खेल हुनेछ । यो अवस्था निकै चुनौतीपुर्ण अवस्था हो । तर चुनौती सामना गर्न टोली तयार छ ।’

यस्तै प्रशिक्षक महर्जनले केही सिनियर खेलाडी चोट र कोरोनाका कारण टोलीमा नरहेको र बंगलादेशमा पनि एक खेलाडीमा कोरोना देखिएको बताउदै यसले पनि टोलीमा केही प्रभाव पर्न सक्ने थपे ।

यता, टोलीका कप्तान किरण चेम्जोङले लामो समयपछि फुटबल खेल्न पाउदा उत्साहित रहेको बताए । ‘मैत्रीपुर्ण खेलको लागि तयारी राम्रै रहेको छ । अहिलेको अवस्थामा खेल्न सहज छैन । यो हाम्रो लागि शारीरिक र मानसिक रुपमा तयार रहन राम्रो अवसर हो,’ कप्तान चेम्जोङले भने ।

घरेलु टोली बंगलादेश पनि घरेलु भुमिमा सकरात्मक नतिजा निकाल्ने दाउमा हुनेछ । यसपटक नेपाली फुटबल टिममा आठ नयाँ अनुहार रहेका छन् । दुई खेलको मैत्रीपूर्ण सिरिजको विजेता टोलीले ट्रफी पनि प्राप्त गर्नेछ । यदि दुवै खेल बराबरीमा सकिएको खण्डमा दोस्रो खेलको अन्त्यमा पेनाल्टी सुटआउट हुनेछ ।

नेपालको सम्भावित सुरुवाती ११

मुख्य प्रशिक्षक योहान कालिनको अनुपस्थितिमा कार्यवाहक प्रशिक्षक बालगोपाल महर्जनले टोलीको जिम्मेवारी सम्हालेका छन् । कोरोना संक्रमण र चोटका कारण केहि नयाँ अनुहारसहित महर्जन बंगलादेश पुगेका छन् । आजको खेलमा पनि महर्जनले केहि खेलाडीलाई डेब्यु दिने देखिन्छ । बेन्चबाट मात्र नभएर पहिलो रोजाइमा पनि केहि खेलाडीले डेब्यु गर्ने सम्भावना रहेको छ ।

पहिलो खेल भएको हुनाले पनि महर्जनले सुरुवाती रोजाइमा काउन्टर अट्याकमा खेल्ने जोड दिनेछन् । त्यसैले प्रराम्भिक ४-२-३-१ को संरचना नै नेपालको लागि उचित देखिन्छ । यसो गर्दा आक्रमणमा नेपाल ४-३-३ को सेपमा देखिनेछ भने रक्षात्मक पद्दतिमा ४-५-१ को रणनीति अबलम्बन हुनेछ ।

गोलरक्षकमा टोलीको कप्तान समेत रहेका किरण चेम्जोङ नै रहने पक्का छ । विकल्पमा रहेका विशाल श्रेष्ठ र दीप कार्कीको सुरुवातमा सम्भावना देखिदैन । यद्यपि खेलका दौरान दोस्रो हाफमा नेपाल सहज अवस्थामा रहँदा विशालले अवसर पाउन सक्छन् ।

डिफेन्समा अनन्त तामाङले सेन्टर डिफेन्समा विक्रम लामा अथवा अजित भण्डारीको साथ पाउने देखिन्छ । महर्जनले विक्रमलाई मिडफिल्डमा खेलाउन चाहेमा अजितले अनन्तसँग खेल्नेछन् । लेफ्ट ब्याकमा रजिन धिमाल फिट नभएको अवस्थामा सुमन अर्यालकै उपस्थिति रहनेछ ।

युवा डिफेन्डर विकास खवासले राइट ब्याकमा खेल्ने सम्भावना रहेको छ । उनले खेलेको अवस्थामा राष्ट्रिय टोलीबाट डेब्यु समेत गर्नेछन् । सरोज दाहाल र छिरिङ गुरुङमध्य एकले बेन्चबाट अवसर पाउन सक्छन् । दिलेन लोक्तान पनि डेब्यु गर्ने अवसरको पर्खाइमा हुनेछन् ।

मिडफिल्डमा विक्रम लामा र तेज तामाङ नै खेल्ने लगभग तय छ । आक्रामक मिडफिल्डको दुई विंग्समा अन्जन विष्ट र रवि पासवान रहनेछन् । सुजल श्रेष्ठ पूर्ण फिट नरहेकाले उनले पहिलो खेल बेन्चमा रहनेछन् ।

आक्रामक मिडफिल्डको जिम्मेवारी एरिक विष्ट र सुभास गुरुङमध्य एकले निभाउने छन् । एरिक रक्षात्मक रणनीति र सेट पिसका लागि पनि सुहाउँदो भएकाले उनले डेब्यु गर्ने सम्भावना छ । मिडफिल्डमा विकल्पका रुपमा पुजन उपरकोटी र सेसेहाङ आङदेम्बे पनि रहनेछन् ।

आक्रमणमा नवयुग श्रेष्ठकै सम्भावना छ । भरत खवास पनि आक्रमणका लागि दावेदार छन् तर सुरुवाती रोजाइमा एक मात्र फरवार्ड खेलाउँदा नवयुगकै नाम अघि देखिन्छ । दोस्रो हाफमा महर्जनले खेलको स्थिति अनुसार भरत वा विमल रानालाई प्रवेश गराउन सक्छन् । विंग्समा खेल्नका लागि जर्जप्रिन्स कार्की, दर्शन गुरुङ लगायतको विकल्प पनि रहनेछ ।

सम्भावित ११ : किरण चेम्जोङ : सुमन अर्याल, अजित भण्डारी/विक्रम लामा, अनन्त तामाङ, विकास खवास : विक्रम लामा/एरिक विष्ट, तेज तामाङ : रवि पासवान, एरिक विष्ट/सुभास गुरुङ, अन्जन विष्ट: नवयुग श्रेष्ठ

नेपाली टोली : अजित भण्डारी, अनन्त तामाङ, अञ्जन विष्ट, एरिक विष्ट, भरत खवास, विकास खवास, विक्रम लामा, विमल राना, विशाल श्रेष्ठ, दर्शन गुरुङ, दीप कार्की, दिलेन लोक्तन, जर्ज प्रिन्स कार्की, किरण चेम्जोङ, नवयुग श्रेष्ठ, पुजन उपरकोटी, रञ्जित धिमाल, रवी पासवान, सरोज दाहाल, सेसेहाङ आङ्देम्बे, सुवास गुरुङ, सुजल श्रेष्ठ, सुमन अर्याल, तेज तामाङ र छिरिङ गुरुङ