एजेन्सी – फिफा विश्वकप २०२० कतार अन्तर्गत दक्षिण अमेरिकी क्षेत्रको छनोटको चौथो चरणको खेलमा ब्राजिलले उरुग्वेको भ्रमण गर्दैछ । खेल नेपाली समयानुसार बुधबार विहान ४:४५ बजे हुनेछ ।

छनोटमा शत प्रतिशत जितको नतिजा हासिल गर्ने एकमात्र टोली ब्राजिल सोहि लयलाई निरन्तरता दिने सुरमा हुनेछ । यता ३ खेलमा ६ अंक जोडेको उरुग्वे घरेलु मैदानमा ब्राजिललाई रोक्दै अंक बराबर गर्ने लक्ष्यसाथ उत्रनेछ । उरुग्वेले अघिल्लो महिना इक्वेडरसँग ४-२ को हार बेहोरेको थियो ।

दक्षिण अमेरिकी छनोटमा यसपछि लामो विश्राम रहेकाले पनि दुवै टोली सुखद नतिजा हासिल गर्ने सुरमा हुनेछन् । तर दुवै टोलीमा चोटको कारण केहि समस्या हुनेछ । मुख्य फरवार्ड नेयमार र लुइस सुआरेजको अनुपस्थितिले खेल केहि खल्लो हुनेछ । नेयमार ग्रोइनको चोटका कारण बाहिर छन् भने सुआरेज कोरोना संक्रमण भएपछि आइसोलेसनमा छन् ।

तर अघिल्लो खेलमा रोबर्टो फिर्मिनोको गोलमा भेनेजुएलालाई हराएको ब्राजिलले अरु खेलाडीमा भर गर्न सक्छ । उरुग्वेले अघिल्लो खेलमा कोलोम्बियालाई ३-० ले पराजित गरेको थियो । उक्त खेलमा एडिन्सन काभानी, सुआरेज र डार्विन न्युनेजले गोल गरेका थिए । प्रशिक्षक ओस्कार टाबारेजको १ सयौं खेलमा उरुग्वेले सानदार प्रदर्शन गरेको थियो ।

उरुग्वेसँग सुआरेजसँगै गोलरक्षक रोड्रीगो म्युनोज र लेफ्ट ब्याक माटीएस भिना साथमा छैनन् । गोलरक्षक गास्टोन ओल्भेइरालाई टोलीमा समावेश गरिएको छ । ब्राजिलसँग पनि मिडफिल्डर क्यासेमिरोको अनुपस्थितिले केहि कठिनाइ हुनसक्छ ।