काठमाडौं (हाम्रो खेलकुद)– बंगलादेशसँगको अन्तर्राष्ट्रिय मैत्रीपूर्ण खेलको सिरिज गुमाएको नेपाली राष्ट्रिय फुटबल टोली बिहीबार स्वेदश फर्कने भएको छ ।

अखिल नेपाल फुटबल संघ (एन्फा) का अनुसार टोलीका अनुसार नेपाली समय अनुसार फुटबल टोली दिउँसो १२ः०० बजे स्वदेशका लागि उड्नेछ । दुई मैत्रीपूर्ण खेलको सिरज नेपालले १–० ले गुमाएको थियो । पहिलो खेलमा २–० को हार बेहोरेको नेपालले मंगलबारको खेल गोलरहित बराबरी खेलेको थियो ।

मैत्रीपूर्ण खेलको तयारीका क्रममा ७ खेलाडीलाई कारोना संक्रमण भएको थियो । जसका कारण ८ नयाँ खेलाडीका साथ नेपाली टोली बंगलादेश पुगेको थियो । नयाँ ८ मध्ये ६ खेलाडीले राष्ट्रिय टोलीबाट डेब्यू गरेका छन् ।

मुख्य प्रशिक्षक योहन कालिन कोरोना महामारीका कारण स्विडेनमा रहेका कारण एन्फाले बालगोपाल महर्जनलाई कार्यवहाक प्रशिक्षकको जिम्मेवारी दिएको थियो । बंगलादेश पुगेपछि टोलीका रक्षक रजिन धिमाललाई कोरोना संक्रमण पुष्टी भएको थियो ।

अर्को परिक्षणमा कारोना नेगेटिभ आएपछि रजिनले मंगलबारको खेल पहिलो रोजाईमा खेलेका थिए । टोली फर्कने तयारीमा रहँदा व्यवस्थापक मधुसुदन उपाध्यायलाई कोरोना संक्रमण भएको छ । उपाध्यायका अनुसार उनलाई लक्षण पनि छ ।

यसअघि ३ पटकको परिक्षणमा नेगेटिभ आएपछि मंगलबारको परिक्षणमा पोजेटिभ देखिएको उनले जानकारी दिए । खेलाडी , प्रशिक्षक लगायत अन्य ३५ जनको परिक्षण भने नेगेटिभ आएको छ । आफू बाहेक सबै बिहीबार फर्कने जनाउँदै उपाध्यायले भने,‘ म परिक्षण नेगेटिभ आएपछि मात्र फर्कन्छु ।’