एजेन्सी – स्पेनले यूईएफए नेसन्स लिग अन्तर्गत मंगलबार राती जर्मनीलाई ६-० ले पराजित गर्दै प्रतियोगिताको सेमिफाइनलमा स्थान पक्का गर्यो । स्पेनको जितमा युवा विंगर फेरान टोरेसले ह्याट्रिक प्रहार गरे ।

एकातर्फ प्रतियोगिताको समिकरण हेर्दा स्पेन अर्को चरणमा पुग्यो भने बराबरी पर्याप्त हुने जर्मनी बाहिरिन पुग्यो । यससँगै जर्मनीका प्रशिक्षक जोकिम लोमाथि पनि दबाब बढेको छ । स्पेनविरुद्ध ६-० को हार जर्मनीले ९० वर्षयता बेहोरेको सबैभन्दा फराकिलो हार हो । कुनैपनि प्रतियोगितामा भने यो हालसम्मकै खराब नतिजा हो ।

स्पेनका लागि फेरान टोरेसले ह्याट्रिक गर्दा अल्भारो मोराटा, रोदरी र मिकेल ओयाराज्बालले १-१ गोल गरे । पहिलो हाफमा नै कप्तान सर्जियो रामोस र सर्जियो कानालेसलाई गुमाउनुका बाबजुद स्पेनले खेल अवधिभर नै जर्मनीलाई दबाबमा राख्यो ।

जर्मनीले पछिल्लो पटक सन् २००१ मा इंग्ल्यान्डविरुद्ध ५-१ को हार बेहोरेको थियो । त्यस्तै सन् १९५४ को विश्वकपमा पश्चिम जर्मनीसँग ८-३ को हारले पनि खुब चर्चा बटुल्ने गर्दथ्यो । सन् १९३१ मा पनि जर्मनी अष्ट्रियासँग ६-० ले नै पराजित भएको थियो ।

खेल अवधिभर नै जर्मनीले स्पेनको पोस्टमा आक्रमण बुन् सकेन । बल पोसेसनको ३० प्रतिशत मात्र पकड जर्मनीको पक्ध्मा थियो । आधा दर्जन गोल गरेको स्पेनले २३ पटक प्रहार गर्दा १६ प्रहार भने पेनाल्टी क्षेत्र भित्रबाट रहेको थियो ।

खेलको म्यान अफ द म्याच घोषित टोरेस जर्मनीविरुद्ध ह्याट्रिक गर्ने पहिलो स्पेनिस खेलाडी बने । यस्तै स्पेनले पहिलो पटक जर्मनीविरुद्ध पहिलो हाफमा नै ३ गोल गर्न सफल भयो ।

स्पेनका गोलरक्षक उनाइ सिमोनले खेल अवधिभर ४१ पास दिएका थिए । जर्मनीका लागि टोनी क्रुस (४३ पास) ले मात्र सिमोनभन्दा बढी पास दिन सफल रहे । जर्मनीका कप्तान तथा गोलरक्षकका लागि भने यो करिअरकै सर्वाधिक खराब प्रदर्शन रहयो ।