काठमाडौं (हाम्रो खेलकुद) – बंगलादेशसँगको दुई अन्तर्राष्ट्रिय मैत्रीपूर्ण खेल ‘मुजिब वर्ष फिफा अन्तराष्ट्रिय फुटबल सिरिज’ पछि नेपाली राष्ट्रिय पुरुष फुटबल टोली बिहीबार स्वदेश फर्किएको छ ।

टोलीलाई अखिल नेपाल फुटबल संघ (एन्फा) का उपाध्यक्ष शिक्षित पराजुली लगायतका पदाधिकारीले स्वागत गरेका थिए । नेपालले ढाकामा दुई मैत्रीपुर्ण खेल खेल्दा एक खेल २–० ले गुमाउदा अर्काे खेल गोलरहित बराबरी खेलेको थियो ।

कतार विश्वकप २०२२ को छनोट र एसियन कपको दोस्रो चरण खेलिरहेको नेपालले थप तयारीका लागि बंगलादेशसँग दुई मैत्रीपूर्ण खेल खेलेको हो । छनोटमा नेपालले अब ३ घरेलु खेल खेल्न बाँकी रहेको छ । अब नेपालले अष्ट्रेलिया, जोर्डन र चाईनिज ताईपेसँग खेल्न बाँकी छ ।

नेपालले सबै अवे र एक होम खेल खेलिसकेको छ । त्रिपुरेश्वरस्थित दशरथ रंगशाला तयार नभएको कारण नेपालले कुवेतविरुद्धको घरेलु खेल न्युट्रल भेन्युको रुपमा भुटानमा खेलेको थियो । छनोट अन्तर्गत नेपाल पहिलो लेगको खेलमा कुवेतसंग ७–० र दोस्रो लेगमा १–० ले पराजित भएको थियो ।

यस्तै, अष्ट्रेलियासँग ५–० र जोर्डनसंग ३–० ले पराजित भएको थियो । अवे खेल अन्तर्गत नेपालले चाईनिज ताईपेलाई २–० ले हराएको थियो । समूह ‘बी’ मा रहेको नेपालको ५ खेलबाट ३ अंक रहेको छ । चाईनिज ताईपेलाई पराजित गरेको नेपाल समूहको चौथो स्थानमा छ । यस समूहको शीर्ष स्थानमा अष्ट्रेलिया रहेको छ ।